(गाझियाबाद)
बॉलीवूड अभिनेत्री दिशा पटानीच्या बरेली येथील घरावर गोळीबार करणाऱ्या दोन्ही आरोपींचा एन्काउंटर करण्यात आला आहे. गाझियाबादच्या टेक्नो सिटी परिसरात झालेल्या चकमकीत यूपी स्पेशल टास्क फोर्स (एसटीएफ) आणि दिल्ली-हरियाणा पोलिसांच्या संयुक्त कारवाईत दोघांनाही ठार केले. ठार झालेले आरोपी रवींद्र (रा. रोहतक) आणि अरुण (रा. सोनीपत) हे गोल्डी ब्रार आणि रोहित गोदारा टोळीचे सक्रिय सदस्य होते. घटनास्थळावरून एक ग्लॉक पिस्तूल, एक जिगाना पिस्तूल आणि मोठ्या प्रमाणात दारूगोळा जप्त करण्यात आला आहे. पोलिसांचा असा अंदाज आहे की, हा हल्ला गोल्डी ब्रार-रोहित गोदारा टोळीच्या सूचनेवर करण्यात आला होता.
काय आहे प्रकरण?
१२ सप्टेंबरच्या पहाटे ३.४५ वाजता दोन अज्ञात हल्लेखोर मोटारसायकलवरून आले आणि बरेलीतील सिव्हिल लाईन्स परिसरात दिशा पटानी च्या घराबाहेर ८ ते १० फायर केले. त्यानंतर ते पळून गेले. या घटनेत कोणीही जखमी झाले नसले तरी परिसरात मोठी दहशत पसरली होती. या घटनेनंतर अभिनेत्रीचे वडील, निवृत्त डीएसपी जगदीश सिंह पाटनी यांनी मुख्यमंत्री योगी आदित्यनाथ यांच्याशी चर्चा केली. मुख्यमंत्र्यांनी त्वरित चौकशीचे आदेश देत पूर्ण सुरक्षा देण्याचे आश्वासन दिले.
पोलिसांनी गुन्हा नोंदवून तपास सुरू केला होता. त्यांनी सर्व सीसीटीव्ही फुटेज तपासले आणि संशयास्पद मार्गांची तपासणी केली. याच बरोबर, शेजारील राज्यांच्या गुन्हेगारी रेकॉर्डशी तुलना करून या दोन्ही गुन्हेगांची ओळख पटली. तपासादरम्यान, रविंद्र हा रोहतकचा तर अरुण हा सोनीपतचा रहिवासी असल्याची माहिती पोलिसांना मिळाली. हे दोन्ही गुन्हेगार या घटनेत सामील होते.
गोळीबारानंतर कुटुंबीय आणि परिसरामध्ये भीतीचे वातावरण होते. त्यामुळे सुरक्षेच्या दृष्टीने गल्लीतल्या मुख्य प्रवेशद्वारावर लोखंडी गेट बसवण्याचे काम तातडीने सुरू करण्यात आले होते. आरोपींच्या एन्काउंटरनंतर स्थानिक पोलिस आणि सुरक्षा यंत्रणांना मोठा दिलासा मिळाला आहे.
