(दापोली)
सह्याद्री शिक्षण संस्था सावर्डे संचलित न्यू इंग्लिश स्कूल अँड ज्युनियर कॉलेज टाळसुरे विद्यालयाची शाल्मली माने या विद्यार्थिनीने तालुकास्तरीय बुद्धिबळ स्पर्धेत उल्लेखनीय कामगिरी करत प्रथम क्रमांकाची मानकरी ठरली आहे. रत्नागिरी जिल्हा बुद्धिबळ स्पर्धेकरिता तिची निवड झाली असून दापोली तालुक्याचे प्रतिनिधित्व करण्याची संधी शाल्मली हिला प्राप्त झाली आहे.
क्रीडा व युवक सेवा संचालनालय महाराष्ट्र राज्य पुणे अंतर्गत जिल्हा क्रीडा परिषद रत्नागिरी व जिल्हा क्रीडा अधिकारी कार्यालय रत्नागिरी यांचे संयुक्त विद्यमाने आयोजित करण्यात आलेल्या तालुकास्तरीय बुद्धिबळ स्पर्धेमध्ये शाल्मली माने हिने 17 वर्षीय वयोगटात प्रथम क्रमांक पटकावलेला आहे.
जिल्हास्तरावर प्रतिनिधित्व करण्याची संधी मिळाल्याबद्दल सह्याद्री शिक्षण संस्था सावर्डेचे कार्याध्यक्ष चिपळूण संगमेश्वरचे विद्यमान आमदार शेखर निकम, सचिव महेश महाडिक, संचालक शांताराम खानविलकर, शालेय समितीचे अध्यक्ष जयवंत जालगावकर, विद्यालयाचे मुख्याध्यापक संदेश राऊत, मार्गदर्शक दीपनंदा बोधे, जीवन गुहागरकर, आदींनी अभिनंदन केले. शाल्मली हिला जिल्हास्तरावरील बुद्धिबळ स्पर्धेसाठी शुभेच्छा देण्यात आल्या.
