( रत्नागिरी / प्रतिनिधी )
“जास्त नफा मिळवून देतो” असे आमिष दाखवत टेलिग्रामच्या माध्यमातून शहरातील एका २८ वर्षीय तरुणाची तब्बल ५ लाख ३३ हजारांची ऑनलाईन फसवणूक झाल्याची घटना उघडकीस आली आहे. ही घटना १४ जून ते १७ जून २०२५ या कालावधीत धनजी नाका परिसरात घडली. या प्रकरणी जी. श्री. किशना या संशयिताविरोधात रत्नागिरी शहर पोलिस ठाण्यात गुन्हा दाखल करण्यात आला आहे.
फिर्यादी माझ एजाज सुभेदार (वय २८, रा. आंबेडकर रोड, रत्नागिरी) यांचा टेलिग्राम अ‍ॅपच्या माध्यमातून संशयिताशी संपर्क झाला. सुरुवातीला ऑनलाईन ट्रेडिंगमध्ये अधिक नफा मिळवून देण्याचे आमिष दाखवून संशयिताने काही रक्कम परत करीत फिर्यादीचा विश्वास संपादन केला. विश्वास बसल्यावर एजाज सुभेदार यांनी स्वतःच्या बँक खात्यातून १ लाख ७५ हजार तर मित्र अजमल साजीद सोलकर यांच्या खात्यातून ३ लाख ५८ हजार, असे एकूण ५ लाख ३३ हजार रुपये संशयिताच्या बँक खात्यात व UPI आयडीद्वारे ट्रान्सफर केले. गुंतवणूक केल्यानंतर नफा तर दूरच, मूळ रक्कमही परत न मिळाल्याने फसवणुकीचा प्रकार लक्षात आल्यावर एजाज सुभेदार यांनी थेट शहर पोलिस ठाण्यात धाव घेत तक्रार दाखल केली.
या प्रकरणी भारतीय न्यायसंहिता अधिनियम 2023 चे कलम 318(4) व माहिती तंत्रज्ञान अधिनियम 2000 चे कलम 66(ड) अन्वये गुन्हा दाखल करण्यात आला आहे. पोलिस अधिक तपास करत असून, ऑनलाईन फसवणुकीतील वाढती प्रकरणे पाहता नागरिकांनी गुंतवणुकीच्या नावाखाली कोणत्याही अनोळखी डिजिटल माध्यमांवर विश्वास न ठेवण्याचे आवाहन प्रशासनाकडून करण्यात येत आहे.
