( मुंबई )
जगातील सर्वाधिक लोकप्रिय मेसेजिंग अ‍ॅप WhatsApp आपल्या वापरकर्त्यांसाठी सातत्याने नवनवीन फीचर्स घेऊन येत असते. आता WhatsApp एक क्रांतिकारी ‘डॉक्युमेंट स्कॅनिंग’ फीचर लाँच करण्याच्या तयारीत आहे, ज्यामुळे युजर्सना थर्ड पार्टी अ‍ॅपशिवायच कोणतेही डॉक्युमेंट स्कॅन करून थेट पीडीएफ स्वरूपात शेअर करता येणार आहे.
काय आहे हे नवीन फीचर?
नवीन Document Scanning Feature लवकरच WhatsApp च्या डॉक्युमेंट शेअरिंग मेनूमध्ये समाविष्ट होणार आहे. युजर्स आपल्या फोनचा कॅमेरा वापरून आवश्यक डॉक्युमेंट स्कॅन करू शकणार असून, ते स्कॅन केलेले दस्तऐवज त्वरित चॅटमधून शेअर करता येतील.
या फीचरमध्ये दोन मोड असणार आहेत:
-
मॅन्युअल मोड: यामध्ये युजर स्वतः हवे तसे डॉक्युमेंट स्कॅन करू शकतो.
-
ऑटोमॅटिक मोड: यामध्ये अ‍ॅप स्वतःच डॉक्युमेंट ओळखून स्कॅनिंग प्रक्रिया पार पाडेल.
स्कॅनिंग ते शेअरिंग – एकाच ठिकाणी
स्कॅन केलेले डॉक्युमेंट WhatsApp वरून पीडीएफ स्वरूपात शेअर करता येणार असून, एंड-टू-एंड एन्क्रिप्शनमुळे वापरकर्त्यांची गोपनीयता पूर्णतः सुरक्षित राहील. यामुळे हे दस्तऐवज केवळ पाठवणारा आणि प्राप्तकर्ता यांनाच दिसतील; तिसऱ्या कोणालाही त्यावर प्रवेश मिळणार नाही. याआधी डॉक्युमेंट स्कॅन करण्यासाठी वापरकर्त्यांना वेगळे स्कॅनर अ‍ॅप्स डाउनलोड करावे लागत होते. मात्र, या फीचरमुळे थेट WhatsApp वरूनच स्कॅनिंग व शेअरिंग शक्य होणार आहे, त्यामुळे वेगळ्या अ‍ॅपची गरज भासणार नाही.
सध्या WhatsApp या फीचरवर काम करत असून, पुढील काही दिवसांत याचे बीटा टेस्टिंग सुरू होणार आहे. त्यानंतर टप्प्याटप्प्याने सर्व युजर्ससाठी हे अपडेट उपलब्ध करून देण्यात येईल. हे नवीन फीचर विद्यार्थ्यांपासून व्यावसायिकांपर्यंत सर्वांसाठी उपयुक्त ठरणार आहे. वेळेची बचत, सुरक्षित शेअरिंग आणि थर्ड पार्टी अ‍ॅप्सपासून स्वातंत्र्य – हे सगळे WhatsApp च्या एका क्लिकवर मिळणार आहे.
