(रत्नागिरी / वार्ताहर)
मुंबई-गोवा राष्ट्रीय महामार्गावरील अंजनारी (ता. लांजा) पुलावरील तीव्र वळणाच्या उतारावर दोन कंटेनरची धडक होऊन झालेल्या अपघातात एक चालक किरकोळ जखमी झाला. हा अपघात आज (गुरुवारी) दुपारी सुमारे १.१५ वाजण्याच्या सुमारास लांजा पोलीस ठाण्याच्या हद्दीत घडला.
मिळालेल्या माहितीनुसार, कंटेनर क्रमांक HR 84 4562 घेऊन चालक जावेद मलिक (रा. सारंगपूर, उत्तर प्रदेश) हे मुंबईहून गोव्याच्या दिशेने जात होते. अंजनारी पुलावरील तीव्र वळणाच्या उतारावर त्यांच्या ताब्यातील कंटेनरवरील नियंत्रण सुटले. त्यानंतर या कंटेनरची पुढे जात असलेल्या MH 46 DL 7111 क्रमांकाच्या कंटेनरला धडक झाली.
या धडकेत चालक जावेद मलिक किरकोळ जखमी झाले. त्यांना जगद्गुरु श्रीमद रामानंदाचार्य नरेंद्रचार्यजी यांच्या रुग्णवाहिकेतून पाली येथील रुग्णालयात पुढील उपचारासाठी दाखल करण्यात आले.
अपघाताची माहिती मिळताच हातखंबा येथील महामार्ग पोलीस घटनास्थळी दाखल झाले. अपघातामुळे काही काळ वाहतूक कोंडी झाली होती. महामार्ग पोलिसांनी घटनास्थळी पोहोचून वाहतूक सुरळीत केली.
अपघातानंतर रस्त्यावरील सुरक्षिततेच्या दृष्टीने बॅरिकेडिंग करण्यात आले असून, अपघातग्रस्त कंटेनर रस्त्याच्या बाजूला हटविण्याची कार्यवाही सुरू करण्यात आली आहे. लांजा पोलीस ठाण्याचे कर्मचारी घटनास्थळी उपस्थित असून, पुढील कार्यवाही सुरू आहे.
