आता PUC प्रमाणपत्रही महागले; दुचाकीपासून डिझेल वाहनांपर्यंत नवे दर लागू, पाहा किती वाढले शुल्क

(मुंबई / वृत्तसंस्था)

राज्यातील वाहनचालकांसाठी महत्त्वाची बातमी आहे. राज्यातील मोटार वाहनांच्या वायुप्रदूषणाची तपासणी करून दिल्या जाणाऱ्या प्रदूषण नियंत्रण प्रमाणपत्राच्या (PUC) शुल्कात वाढ करण्यास राज्य सरकारने मंजुरी दिली आहे. परिवहन आयुक्त कार्यालयाने यासंदर्भात परिपत्रक जारी केले असून, राज्यातील सर्व PUC केंद्रांना सुधारित दरानुसार शुल्क आकारण्याचे निर्देश देण्यात आले आहेत.

नव्या दरानुसार दुचाकी वाहनांच्या PUC तपासणी शुल्कात १० रुपयांची वाढ झाली आहे. त्यामुळे दुचाकी वाहनांसाठीचे शुल्क ५० रुपयांवरून ६० रुपये करण्यात आले आहे. पेट्रोलवर चालणाऱ्या तीनचाकी वाहनांसाठीचे शुल्क १०० रुपयांवरून १२० रुपये करण्यात आले आहे.

पेट्रोल, सीएनजी आणि एलपीजीवर चालणाऱ्या वाहनांच्या PUC तपासणी शुल्कातही वाढ करण्यात आली आहे. या वाहनांसाठीचे शुल्क १२५ रुपयांवरून १४० रुपये करण्यात आले आहे. तर डिझेल वाहनांच्या PUC तपासणी शुल्कात सर्वाधिक ४० रुपयांची वाढ करण्यात आली असून, हे शुल्क आता १४० रुपयांवरून १८० रुपये झाले आहे.

महाराष्ट्र स्टेट PUC सेंटर ओनर्स असोसिएशनने PUC शुल्कात वाढ करण्याची मागणी केली होती. त्यानंतर राज्यातील तसेच इतर राज्यांमधील PUC शुल्काचा अभ्यास करण्यासाठी त्रिसदस्यीय समिती स्थापन करण्यात आली. समितीने विविध बाबींचा अभ्यास करून अहवाल सादल्यानंतर शुल्कवाढीचा प्रस्ताव सरकारकडे पाठवण्यात आला.

दरम्यान, PUC केंद्र चालकांच्या संघटनेविरुद्ध उच्च न्यायालयात दाखल याचिकेच्या सुनावणीदरम्यान परिवहन विभागाला आदेश प्राप्त झाल्यापासून चार महिन्यांच्या आत निर्णय घेण्याचे निर्देश देण्यात आले होते. त्यानुसार परिवहन विभागाने सुधारित PUC शुल्काला मंजुरी दिली आहे.

नव्या दरांनुसार वाहनचालकांना आता PUC प्रमाणपत्रासाठी अधिक पैसे मोजावे लागणार आहेत. विशेषतः डिझेल वाहनांच्या शुल्कात ४० रुपयांची वाढ झाल्याने या वाहनधारकांवर सर्वाधिक अतिरिक्त खर्चाचा भार पडणार आहे. पेट्रोल, सीएनजी आणि एलपीजी वाहनांच्या शुल्कात १५ रुपयांची, तर दुचाकी वाहनांच्या शुल्कात १० रुपयांची वाढ करण्यात आली आहे.

वाहनचालकांसाठी महत्त्वाची बाब म्हणजे PUC केंद्रांच्या दर्शनी भागात सुधारित शुल्काचा फलक ठळकपणे लावणे बंधनकारक करण्यात आले आहे. परिवहन विभागाने सर्व वायुप्रदूषण तपासणी केंद्रांच्या मालकांना सुधारित दरांची माहिती देण्याचे निर्देश दिले आहेत. निर्धारित दरापेक्षा अधिक शुल्क आकारल्यास संबंधित PUC केंद्र चालकांवर कारवाई केली जाऊ शकते.

म्हणून PUC प्रमाणपत्र काढताना वाहनचालकांनी आपल्या वाहनाच्या प्रकारानुसार लागू असलेले अधिकृत शुल्कच द्यावे. अतिरिक्त शुल्क आकारले जात असल्यास संबंधित केंद्राविरुद्ध तक्रार करण्याची तरतूद असल्याचे परिवहन विभागाने स्पष्ट केले आहे.

वाहन प्रकारनिहाय PUC शुल्क