(मुंबई / वृत्तसंस्था)
कफ परेड परिसरातील आर्मी कॅम्पसमधील एका आर्मी अधिकाऱ्याच्या घरातून तब्बल 16 तोळे 6 ग्रॅम सोन्याचे दागिने, विदेशी चलन आणि भारतीय रोकड चोरीला गेल्याच्या प्रकरणाचा कफ परेड पोलिसांनी उलगडा केला आहे. सुमारे सात महिन्यांपूर्वी झालेल्या या चोरीप्रकरणी पोलिसांनी सपना संजय सिंह (37) या महिलेला अटक केली असून, चोरीचा मुद्देमालही जप्त करण्यात आला आहे.
पोलिसांनी दिलेल्या माहितीनुसार, फिर्यादी सविता राजीव द्विवेदी (45) या कफ परेड येथील आर्मी कॅम्पसमध्ये राहतात. जानेवारी महिन्यात त्या कुटुंबासह सुमारे दोन महिन्यांसाठी बाहेरगावी गेल्या होत्या. याच कालावधीत त्यांच्या घरातील कपाटातून 16 तोळे 6 ग्रॅम सोन्याचे दागिने, विदेशी चलन आणि भारतीय रोकड चोरीला गेली. चोरी झालेल्या सोन्याच्या दागिन्यांची अंदाजे किंमत 16 लाख 64 हजार रुपये असल्याचे पोलिसांनी सांगितले.
घरातून चोरी झाल्याचे लक्षात आल्यानंतर याप्रकरणी कफ परेड पोलिस ठाण्यात गुन्हा दाखल करण्यात आला. चोरीचा तपास पोलिस उपनिरीक्षक प्रशांत नेरकर यांच्याकडे सोपवण्यात आला होता. पोलिसांनी उपलब्ध माहिती, तांत्रिक तपास आणि इतर पुराव्यांच्या आधारे तपास सुरू ठेवला.
तपासादरम्यान पोलिसांना सपना संजय सिंह या महिलेचा या चोरीशी संबंध असल्याचे निष्पन्न झाले. त्यानंतर पोलिसांनी तिला ताब्यात घेऊन चौकशी केली. पुढील तपासात चोरीचा मुद्देमाल तिच्याकडून जप्त करण्यात आल्याचे पोलिसांनी सांगितले. सपना सिंह ही कफ परेडमधील नोफरा परिसरातील जेकब हाऊस बिल्डिंगमधील खोली क्रमांक 9 येथे राहत असल्याची माहिती पोलिसांनी दिली.
या प्रकरणाच्या तपासासाठी पोलिस उपनिरीक्षक प्रशांत नेरकर यांच्यासह पोलिस हवालदार संतोष पाटील, शेखर फड, सचिन खामकर, पोलिस शिपाई विलास जाधव आणि कुमार पाथरूट यांनी काम केले. सात महिन्यांपूर्वी झालेल्या चोरीचा तपास पुढे नेत महिला आरोपीपर्यंत पोहोचण्यात कफ परेड पोलिसांना यश आले आहे.
या प्रकरणात चोरीला गेलेला मुद्देमाल जप्त करण्यात आल्याने तपासाला महत्त्वपूर्ण यश मिळाले आहे. आरोपी महिलेविरोधात पुढील कायदेशीर कारवाई सुरू असून, चोरीतील इतर बाबींबाबत पोलिसांचा तपास सुरू आहे.
