(रत्नागिरी / वार्ताहर)
रक्षाबंधन हा भाऊ-बहिणीच्या पवित्र नात्यातील प्रेम, आपुलकी आणि संरक्षणाची भावना जपणारा सण. प्रत्येक भाऊ आपल्या बहिणीचे रक्षण करण्याचे वचन देतो. त्याचप्रमाणे देशाच्या सीमांचे आणि कोट्यवधी भारतीयांचे संरक्षण करण्याची जबाबदारी आपले जवान अहोरात्र पार पाडत असतात. या जवानांप्रती कृतज्ञता आणि आपुलकी व्यक्त करण्यासाठी रक्षाबंधनाचे औचित्य साधून ल. ग. पटवर्धन प्राथमिक विद्यामंदिरमध्ये ‘एक राखी भारतीय जवानांसाठी’ हा उपक्रम उत्साहात राबविण्यात आला.
या उपक्रमात इयत्ता चौथीतील विद्यार्थिनी तसेच शाळेतील शिक्षिकांनी उत्स्फूर्त सहभाग घेत स्वतःच्या हाताने आकर्षक राख्या तयार केल्या. विद्यार्थिनींनी केवळ राख्या तयार न करता प्रत्येक राखीसोबत सीमेवर कर्तव्य बजावणाऱ्या जवानांसाठी आपुलकीचा आणि कृतज्ञतेचा संदेश असलेले संदेशकार्डही तयार केले. विद्यार्थिनींच्या या छोट्याशा कृतीतून देशाच्या रक्षणासाठी सदैव तत्पर असलेल्या जवानांप्रती असलेला आदर आणि प्रेम व्यक्त झाले.
विद्यार्थिनींनी तयार केलेल्या या राख्या टपाल सेवेच्या माध्यमातून प्रत्यक्ष सीमेवरील भारतीय जवानांपर्यंत पाठविण्यात आल्या. आपल्या हाताने तयार केलेली राखी देशाच्या सीमेवर कर्तव्य बजावणाऱ्या जवानांच्या हातावर बांधली जाणार असल्याने विद्यार्थिनींमध्ये विशेष उत्साह आणि आनंदाचे वातावरण होते.
‘एक राखी भारतीय जवानांसाठी’ या उपक्रमाच्या माध्यमातून विद्यार्थिनींमध्ये सामाजिक बांधिलकी, राष्ट्रीय एकात्मता, बंधुता आणि सर्जनशीलता यांसारखी मूल्ये रुजविण्याचा प्रयत्न करण्यात आला. देशाच्या रक्षणासाठी कुटुंबापासून दूर राहून सीमेवर कर्तव्य बजावणाऱ्या जवानांविषयी कृतज्ञता व्यक्त करण्याची संधी विद्यार्थिनींना मिळाली. स्वतः तयार केलेल्या राख्या सैनिकांना पाठविताना त्यांना मिळालेला आनंदही त्यांच्या चेहऱ्यावर स्पष्टपणे दिसून आला.
देशाच्या सुरक्षेसाठी निष्ठेने आणि धैर्याने कर्तव्य बजावणाऱ्या सैनिकांविषयी आपल्या मनात कायम आदर, कृतज्ञता आणि आपुलकीची भावना असली पाहिजे, याची जाणीव या उपक्रमातून विद्यार्थिनींच्या मनात निर्माण झाली. रक्षाबंधनाच्या सणाला देशप्रेमाची आणि सामाजिक बांधिलकीची जोड देत शाळेने राबविलेला हा उपक्रम विद्यार्थिनींसाठी निश्चितच प्रेरणादायी ठरला.
हा उपक्रम यशस्वी करण्यासाठी मुख्याध्यापिका सौ. सायली राजवाडे यांच्या मार्गदर्शनाखाली शिक्षिका दुर्वा भोरे आणि श्रेया मांडवकर तसेच क्लर्क विक्रांत भाटकर यांनी विशेष मेहनत घेतली. शालेय समितीचे अध्यक्ष मनोज पाटणकर तसेच पालक बंधू-भगिनींनी या उपक्रमाचे कौतुक करून विद्यार्थिनींच्या या उपक्रमाला प्रोत्साहन दिले.
