रेल्वेत सरकारी नोकरीच्या शोधात असलेल्या तरुणांसाठी महत्त्वाची बातमी आहे. रेल्वे भरती मंडळाने (RRB) ज्युनियर इंजिनिअर (JE), डेपो मटेरियल सुपरिंटेंडेंट (DMS) आणि केमिकल अँड मेटलर्जिकल असिस्टंट (CMA) या पदांसाठी भरती प्रक्रिया सुरू केली आहे. या भरतीअंतर्गत एकूण ३,९९३ रिक्त पदे भरण्यात येणार आहेत. पात्र उमेदवारांना १४ ऑगस्ट २०२६पासून ऑनलाइन अर्ज करता येत असून अर्ज करण्याची अंतिम मुदत १३ सप्टेंबर २०२६ आहे.
या भरतीमध्ये अभियांत्रिकी आणि तांत्रिक क्षेत्रातील विविध पदांचा समावेश आहे. इंजिनिअरिंग विभागासाठी १,६३८, मेकॅनिकलसाठी १,१२५, इलेक्ट्रिकलसाठी ५९९, स्टोअर्ससाठी ३२४ आणि सिग्नल अँड टेलिकम्युनिकेशन (S&T) विभागासाठी ३०७ पदे उपलब्ध आहेत.
प्रवर्गनिहाय पाहिल्यास खुल्या प्रवर्गासाठी १,६९९ पदे, अनुसूचित जाती (SC) प्रवर्गासाठी ६२४, अनुसूचित जमाती (ST) प्रवर्गासाठी ३६३, इतर मागासवर्गीय (OBC) प्रवर्गासाठी ९१३ आणि आर्थिकदृष्ट्या दुर्बल घटक (EWS) प्रवर्गासाठी ३९४ पदे आहेत.
ज्युनियर इंजिनिअर (JE) पदासाठी संबंधित अभियांत्रिकी शाखेतील मान्यताप्राप्त संस्थेचा तीन वर्षांचा डिप्लोमा किंवा BE/BTech पदवी आवश्यक आहे. डेपो मटेरियल सुपरिंटेंडेंट (DMS) पदासाठी कोणत्याही अभियांत्रिकी शाखेतील तीन वर्षांचा डिप्लोमा आवश्यक आहे. संबंधित अभियांत्रिकी शाखांमध्ये सिव्हिल, मेकॅनिकल, इलेक्ट्रिकल, इलेक्ट्रॉनिक्स, कॉम्प्युटर आदी शाखांचा समावेश आहे. आवश्यक शैक्षणिक पात्रतेचा अंतिम निकाल अर्जाच्या अंतिम तारखेपर्यंत जाहीर झालेला असणे आवश्यक आहे. अंतिम निकालाची प्रतीक्षा करणारे उमेदवार पात्र ठरणार नाहीत.
वयोमर्यादेचा विचार केल्यास १ जानेवारी २०२७ रोजी उमेदवाराचे वय १८ ते ३३ वर्षांच्या दरम्यान असणे आवश्यक आहे. आरक्षित प्रवर्गातील उमेदवारांना सरकारी नियमानुसार वयोमर्यादेत सवलत मिळणार आहे. अनुसूचित जाती आणि अनुसूचित जमातीच्या उमेदवारांना पाच वर्षे, तर OBC-NCL उमेदवारांना तीन वर्षांची वयोमर्यादा सवलत लागू आहे. इतर पात्र प्रवर्गांसाठीही नियमानुसार सवलत दिली जाईल.
या भरतीसाठी अर्ज प्रक्रिया १४ ऑगस्ट २०२६पासून सुरू झाली असून १३ सप्टेंबर २०२६ रोजी रात्री ११.५९ वाजता अर्ज प्रक्रिया बंद होईल. अर्ज शुल्क भरण्याची अंतिम तारीख १५ सप्टेंबर २०२६ आहे. अर्जातील आवश्यक दुरुस्ती १६ ते २५ सप्टेंबर २०२६ या कालावधीत करता येईल, तर स्क्राइबशी संबंधित माहिती देण्यासाठी २६ ते ३० सप्टेंबर २०२६पर्यंत मुदत देण्यात आली आहे. CBT-1 परीक्षेची तारीख नंतर जाहीर करण्यात येणार आहे.
अर्ज शुल्काच्या बाबतीत खुल्या, OBC आणि EWS प्रवर्गातील उमेदवारांसाठी ५०० रुपये शुल्क आहे. CBT-1 परीक्षेला उपस्थित राहिल्यानंतर त्यापैकी ४०० रुपये परत केले जातील. SC, ST, महिला, दिव्यांग, माजी सैनिक, अल्पसंख्याक आणि EBC प्रवर्गातील उमेदवारांसाठी २५० रुपये शुल्क असून CBT-1 परीक्षेला उपस्थित राहिल्यानंतर नियमानुसार संपूर्ण रक्कम परत केली जाईल.
पात्र उमेदवारांनी संबंधित RRBच्या अधिकृत अर्ज पोर्टलवर जाऊन प्रथम नोंदणी करावी. त्यानंतर संबंधित RRB झोन, पद आणि शाखेची निवड करून वैयक्तिक, शैक्षणिक आणि प्रवर्गाशी संबंधित माहिती भरावी. आवश्यक कागदपत्रे, छायाचित्र आणि स्वाक्षरी अपलोड करून ऑनलाइन अर्ज शुल्क भरावे. अर्ज सबमिट केल्यानंतर कन्फर्मेशन पेज डाउनलोड करून भविष्यातील संदर्भासाठी जतन करणे महत्त्वाचे आहे.
रेल्वे भरतीसाठी अर्ज करण्यापूर्वी उमेदवारांनी संबंधित RRBची अधिकृत जाहिरात काळजीपूर्वक वाचावी. शैक्षणिक पात्रता, वयोमर्यादा, प्रवर्गनिहाय आरक्षण, शुल्क आणि इतर सर्व अटी तपासल्यानंतरच अर्ज करावा. बनावट वेबसाइट किंवा अनधिकृत लिंकवरून अर्ज अथवा शुल्क भरू नये.
