(सावंतवाडी / वार्ताहर)
सावंतवाडी प्रांत कार्यालयात नायब तहसीलदार म्हणून कार्यरत असलेले मनोज मुसळे (वय ५५, रा. कणकवली) यांचे आज सकाळी हृदयविकाराच्या झटक्याने दुःखद निधन झाले. प्रकृती अचानक अस्वस्थ झाल्यानंतर त्यांना तातडीने सावंतवाडी उपजिल्हा रुग्णालयात दाखल करण्यात आले. मात्र, उपचार सुरू असतानाच त्यांची प्राणज्योत मालवली.
मनोज मुसळे यांनी महसूल विभागात प्रदीर्घ सेवा बजावली होती. आपल्या सेवाकाळात त्यांनी कणकवली, वैभववाडी, मालवण, कुडाळ आणि सावंतवाडी येथील तहसीलदार कार्यालयांमध्ये नायब तहसीलदार म्हणून विविध जबाबदाऱ्या सांभाळल्या. महसूल प्रशासनातील कामकाजाचा प्रदीर्घ अनुभव असलेले मुसळे हे कर्तव्यनिष्ठ आणि अनुभवी अधिकारी म्हणून परिचित होते.
सध्या ते सावंतवाडी प्रांत कार्यालयात नायब तहसीलदार म्हणून कार्यरत होते. महसूल प्रशासनातील विविध जबाबदाऱ्या सक्षमपणे पार पाडताना त्यांनी आपल्या कामातून वेगळी ओळख निर्माण केली होती. त्यांच्या आकस्मिक निधनाची माहिती समोर आल्यानंतर महसूल विभागातील अधिकारी, कर्मचारी तसेच सावंतवाडी आणि कणकवली परिसरातील नागरिकांकडून हळहळ व्यक्त होत आहे.
मुसळे यांच्या आकस्मिक निधनाने महसूल प्रशासनातील एक अनुभवी आणि कर्तव्यनिष्ठ अधिकारी गमावल्याची भावना व्यक्त होत असून त्यांच्या कुटुंबीयांप्रती अधिकारी, कर्मचारी आणि नागरिकांकडून शोकसंवेदना व्यक्त करण्यात येत आहेत.
