(नवी दिल्ली / वृत्तसंस्था)
नीट (NEET) पेपरफुटी प्रकरणाच्या पार्श्वभूमीवर देशभरात झालेल्या आंदोलनानंतर केंद्र सरकारने परीक्षा व्यवस्थेत मोठे बदल करण्याची घोषणा केली आहे. विद्यार्थ्यांच्या भविष्याशी कोणतीही तडजोड होणार नाही, असा पुनरुच्चार करत पंतप्रधान नरेंद्र मोदी यांनी भविष्यात पेपरफुटीच्या घटना रोखण्यासाठी अत्याधुनिक तंत्रज्ञानाचा वापर केला जाणार असल्याचे जाहीर केले. याचबरोबर परीक्षा प्रणाली अधिक पारदर्शक आणि विश्वासार्ह करण्यासाठी इन्फोसिसचे सहसंस्थापक नंदन निलेकणी यांच्या नेतृत्वाखाली हाय पॉवर्ड टास्कफोर्स स्थापन करण्याचा निर्णय घेण्यात आल्याचे त्यांनी सांगितले.
सोशल मीडिया प्लॅटफॉर्म X वर प्रसिद्ध केलेल्या व्हिडिओ संदेशात पंतप्रधान मोदी म्हणाले, “सरकार विद्यार्थ्यांच्या उज्ज्वल भविष्यासाठी सातत्याने विविध पावले उचलत आहे. विद्यार्थ्यांच्या भविष्याशी खेळ करणाऱ्यांवर कठोर कारवाई करण्यात आली असून संबंधित आरोपी तुरुंगात आहेत. तसेच जलदगती न्यायालयांची स्थापना करण्यात आली आहे. याशिवाय संसदेत कठोर कायदेशीर तरतुदी असलेले नवीन विधेयक आणण्याचे काम सुरू आहे. मात्र, भविष्यात अशा घटना घडू नयेत यासाठी तंत्रज्ञानाचा अधिक प्रभावी वापर करणे आवश्यक आहे.”
परीक्षा प्रक्रियेत पारदर्शकता आणि विश्वासार्हता वाढवण्यासाठी तंत्रज्ञानाची महत्त्वाची भूमिका असेल, असे सांगताना मोदी म्हणाले की, “देशाची परीक्षा प्रणाली अधिक सुरक्षित, आधुनिक आणि विश्वासार्ह करण्यासाठी जागतिक ख्यातीचे तंत्रज्ञान तज्ज्ञ नंदन निलेकणी यांच्या नेतृत्वाखाली हाय पॉवर्ड टास्कफोर्स स्थापन करण्याचा निर्णय घेण्यात आला आहे. ही समिती परीक्षा सुधारणांबाबत सविस्तर शिफारसी करेल आणि त्या अहवालाच्या आधारे आगामी सर्व स्पर्धा परीक्षा अधिक सुरक्षित आणि पारदर्शक करण्यासाठी तातडीने आवश्यक उपाययोजना राबवल्या जातील.”
दरम्यान, केंद्र सरकारने आंदोलनकर्त्यांच्या प्रमुख मागण्यांवर सकारात्मक भूमिका घेतल्याची माहिती समोर आली आहे. त्यानुसार आंदोलक विद्यार्थ्यांवरील गुन्हे मागे घेण्याची प्रक्रिया सुरू करण्यात येणार असून, आंदोलनाच्या काळात आत्महत्या केलेल्या विद्यार्थ्यांच्या कुटुंबीयांना आर्थिक मदत देण्याचाही निर्णय घेण्यात आल्याचे सांगितले जात आहे. या निर्णयांनंतर जंतर-मंतर येथे सुरू असलेले विद्यार्थ्यांचे आंदोलन मागे घेण्यात आले.
