(रायगड / खोपोली)
मुसळधार पावसामुळे मुंबई-पुणे जुन्या महामार्गावरील खंडाळा घाटात रस्त्यावर कोसळलेले झाड हटवून वाहतूक सुरळीत करण्यासाठी मदतीला धावलेल्या खोपोलीतील एका तरुणाचा अत्यंत दुर्दैवी मृत्यू झाला आहे. अमन मुजावर या तरुणाने कोणत्याही स्वार्थाशिवाय नागरिकांच्या मदतीसाठी जीवाची पर्वा न करता काम केले. मात्र, मदतकार्यादरम्यान झालेल्या अपघातात गंभीर दुखापत झाल्याने उपचार सुरू असताना त्याची प्राणज्योत मालवली. या घटनेमुळे खोपोलीसह संपूर्ण परिसरात हळहळ व्यक्त होत आहे. मृत अमन मुजावर हा शिळगाव (ता. खालापूर) येथील रहिवासी असून त्याचे वय सुमारे २२ वर्षे आहे.
मुसळधार पावसामुळे खंडाळा घाटात वाहतूक ठप्प
सोमवारी सकाळपासून सुरू असलेल्या मुसळधार पावसामुळे मुंबई-पुणे जुन्या महामार्गावरील खंडाळा घाट (बोरघाट) परिसरात मोठे झाड रस्त्यावर कोसळले होते. त्यामुळे महामार्गावरील वाहतूक पूर्णपणे विस्कळीत झाली होती आणि वाहनांच्या लांबच लांब रांगा लागल्या होत्या. रस्त्यावर झाड पडल्याची माहिती सोशल मीडियावरील स्थानिक ग्रुपवर मिळताच अमन मुजावरने क्षणाचाही विलंब न करता आपल्या १० ते १२ मित्रांसह घटनास्थळी धाव घेतली.
नागरिकांच्या मदतीसाठी स्वतःहून उतरला मैदानात
घटनास्थळी पोहोचल्यानंतर अमन आणि त्याच्या मित्रांनी कोणत्याही सरकारी यंत्रणेची वाट न पाहता रस्त्यावरील झाड हटविण्याचे काम सुरू केले. वाहतूक लवकर सुरू व्हावी आणि अडकलेल्या प्रवाशांना दिलासा मिळावा, या उद्देशाने त्यांनी बोलेरो गाडीने झाडाच्या मोठ्या फांद्या दोरीने बांधून त्या रस्त्याच्या कडेला ओढण्याचा प्रयत्न सुरू केला. या कामासाठी एका बोलेरो पिकअप व्हॅनचीही मदत घेण्यात आली होती.
दोरी तुटली आणि फांदी थेट पोटावर आदळली
झाडाची जाड फांदी ओढताना दोरीवर प्रचंड ताण निर्माण झाला. सर्वजण ताकदीने दोरी ओढत असतानाच अचानक दोरी तुटली. त्यामुळे ताणलेल्या अवस्थेतील झाडाची मोठी फांदी वेगाने मागे आली आणि थेट अमनच्या पोटावर जोरात आदळली. या धडकेमुळे अमन काही क्षण जागीच कोसळला. त्याला तीव्र वेदना होत असतानाही त्याने काही वेळाने स्वतःला सावरले आणि पुन्हा मदतकार्य सुरू ठेवले. आपल्या दुखापतीची गंभीरता त्याने कोणालाही जाणवू दिली नाही. ही फांदी ही अमनच्या पोटात जोराने लागली होती. सुरूवातील तो गंमत करतोय, असं त्याच्या मित्रांना वाटलं.
वेदना सहन करत घरी गेला, पण प्रकृती खालावत गेली
मदतकार्य पूर्ण केल्यानंतर अमन घरी परतला. पोटाला गंभीर मार लागूनही त्याने कुटुंबीयांना याबाबत काहीच सांगितले नाही. मात्र, पुढील दोन दिवसांत त्याची प्रकृती झपाट्याने खालावत गेली. वेदना असह्य झाल्यानंतर त्याला तातडीने रुग्णालयात दाखल करण्यात आले. तपासणीत अंतर्गत गंभीर दुखापत झाल्याचे डॉक्टरांच्या निदर्शनास आले.
उपचार सुरू असतानाच मृत्यू
डॉक्टरांनी अमनवर उपचार सुरू केले. मात्र, अंतर्गत दुखापत गंभीर असल्याने उपचारांना अपेक्षित प्रतिसाद मिळाला नाही. अखेर बुधवारी संध्याकाळी उपचारादरम्यान अमनची प्राणज्योत मालवली. त्याच्या निधनाची बातमी समजताच खोपोली आणि परिसरात शोककळा पसरली. बुधवारी रात्री उशिरा अत्यंत शोकाकुल वातावरणात खोपोलीच्या दफनभूमीत त्याच्यावर अंत्यसंस्कार करण्यात आले.
कुटुंबावर दुःखाचा डोंगर
अमनच्या पश्चात आई-वडील, भाऊ आणि बहीण असा परिवार आहे. अत्यंत मदतीचा स्वभाव आणि सामाजिक कार्यात नेहमी पुढे असणारा तरुण अशी त्याची परिसरात ओळख होती. इतरांना मदत करण्यासाठी धावून गेलेल्या अमनचा अशा प्रकारे मृत्यू झाल्याने सर्वत्र हळहळ व्यक्त होत आहे.
मदत करताना स्वतःची सुरक्षितताही तितकीच महत्त्वाची
पावसाळ्यात झाडे कोसळणे, दरडी कोसळणे किंवा विद्युत तारा तुटण्यासारख्या घटना वारंवार घडत असतात. अशा वेळी नागरिकांनी मदतीसाठी पुढे येताना स्वतःच्या सुरक्षिततेलाही प्राधान्य द्यावे आणि शक्यतो संबंधित प्रशासन, अग्निशमन दल किंवा आपत्ती व्यवस्थापन यंत्रणेला तातडीने माहिती द्यावी, असे आवाहन प्रशासनाकडून करण्यात येत आहे.
