(बदलापूर /मुंबई)
मित्राच्या वाढदिवसाचा आनंद क्षणार्धात शोकात बदलणारा भीषण अपघात रविवारी पहाटे बदलापूरजवळ घडला. मुंबई-वडोदरा महामार्गाच्या अपूर्ण भागावर ताशी सुमारे 251 किलोमीटर वेगाने धावणारी आलिशान ओपन-रूफ कार दुभाजकाला धडकून झालेल्या या दुर्घटनेत दोन तरुणांचा जागीच मृत्यू झाला, तर एक जण गंभीर जखमी झाला आहे. मृतांची ओळख योगेश किशन नेगी (24) आणि रेबेका बाबू जेकब (22) अशी झाली आहे. जखमी झालेल्या अंगद गिल (26) याच्यावर कल्याणमधील फोर्टिस रुग्णालयात अतिदक्षता विभागात उपचार सुरू आहेत.
पोलिसांनी दिलेल्या माहितीनुसार, हा अपघात बदलापूर पश्चिमेतील एरनझाड परिसरात पहाटे सुमारे 2 वाजता घडला. टिटवाळ्याहून बदलापूरच्या दिशेने येताना चालकाचे नियंत्रण सुटले आणि भरधाव वेगामुळे गाडी थेट दुभाजकावर आदळली. धडक इतकी भीषण होती की कार अनेक वेळा उलटली आणि तिचा अक्षरशः चक्काचूर झाला.
या अपघातात गाडीतील प्रवासी रस्त्यावर फेकले जाऊन मृतदेह मोठ्या अंतरावर विखुरलेले आढळले. घटनास्थळी गाडीचा एक व्हिडिओ समोर आला असून त्यात वाहन अतिवेगाने धावत असल्याचे दिसते. मृतांपैकी एकाचा वाढदिवस साजरा करण्यासाठी हे तिघे मित्र रात्री बाहेर गेले होते. मात्र हा आनंदाचा क्षण काही तासांतच दुःखद घटनेत बदलला.
बदलापूर पश्चिम पोलिस ठाण्याचे वरिष्ठ पोलीस निरीक्षकांनी सांगितले की, अपघाताचे नेमके कारण, चालकाची ओळख आणि वाहन महामार्गाच्या बंद भागात कसे आले याचा तपास सुरू आहे. संबंधित महामार्गाचा भाग अद्याप बांधकामाधीन असून तो सर्वसामान्यांसाठी खुला नसल्याचेही प्राथमिक तपासात समोर आले आहे.
