(मुंबई)
महाराष्ट्र शासनाच्या सांस्कृतिक कार्य विभागाने गणेशोत्सवाला २०२५ पासून ‘राज्य महोत्सवा’चा दर्जा दिला आहे. या ऐतिहासिक निर्णयामुळे यंदाच्या गणेशोत्सवाला विशेष महत्त्व प्राप्त झाले आहे. या उपक्रमांतर्गत राज्यातील १८०० भजनी मंडळांना भजन साहित्य खरेदीसाठी प्रत्येकी ₹२५,००० चे भांडवली अनुदान देण्यात येणार असल्याची माहिती सांस्कृतिक कार्य मंत्री ॲड. आशिष शेलार यांनी दिली.
राज्य महोत्सवांतर्गत सांस्कृतिक उपक्रमांना चालना
गणेशोत्सवाला राज्य महोत्सवाचा दर्जा देऊन संपूर्ण महाराष्ट्रात विविध सांस्कृतिक कार्यक्रम आणि उपक्रमांचे आयोजन करण्यात येणार आहे. याचाच भाग म्हणून भजनी मंडळांना हे आर्थिक पाठबळ देण्याचा निर्णय घेण्यात आला आहे. १४ ऑगस्ट २०२५ रोजीच्या शासन निर्णयानुसार, या योजनेसाठी ₹५ कोटींची तरतूद करण्यात आली आहे.
नोंदणीकृत भजनी मंडळे आणि भजन क्षेत्रातील शिखर संस्थांनी प्रमाणित केलेली मंडळे या योजनेसाठी पात्र असतील. यासंदर्भातील अटी व शर्ती लवकरच स्वतंत्र शासन निर्णयाद्वारे जाहीर करण्यात येणार आहेत.
ऑनलाइन अर्ज प्रक्रिया कशी कराल?
भजनी मंडळांनी हे अनुदान मिळवण्यासाठी २३ ऑगस्ट ते ६ सप्टेंबर २०२५ या कालावधीत https://mahaanudan.org
या पोर्टलवर ऑनलाइन अर्ज करणे आवश्यक आहे. अर्ज करण्यासाठी खालील टप्पे पूर्ण करावे लागतील:
- प्रथम पोर्टलवर नोंदणी करावी लागेल.
- नोंदणी करताना प्रशासकीय विभाग, जिल्हा, तालुका, गाव किंवा नगरपालिका/नगरपंचायत यांची निवड करावी लागेल.
- त्यानंतर मंडळाचे नाव, पत्ता, मोबाइल क्रमांक आणि ईमेल आयडी भरून लॉगिन करावे लागेल.
- लॉगिननंतर अर्ज सादर करावा.
अधिकाधिक भजनी मंडळांनी या संधीचा लाभ घ्यावा, असे आवाहन मंत्री आशिष शेलार यांनी केले आहे.
सांस्कृतिक वारशाला बळकटी
गणेशोत्सवाला राज्य महोत्सवाचा दर्जा देण्यामागचा उद्देश म्हणजे महाराष्ट्राचा समृद्ध सांस्कृतिक वारसा जपणे, भजनी मंडळांना सशक्त आर्थिक पाठबळ देणे आणि स्थानिक कलावंतांना प्रोत्साहन मिळवून देणे. यामुळे गणेशोत्सवात धार्मिकतेबरोबरच सांस्कृतिक रंगतही वाढणार असल्याची अपेक्षा व्यक्त होत आहे.
