(देवरुख)
संगमेश्वर तालुक्यातील देवरुख ग्रामीण रुग्णालयात डॉक्टर वेळेत उपलब्ध नसल्याने सर्पदंश झालेल्या वृद्ध महिलेचा मृत्यू झाल्याचा आरोप करत ग्रामस्थांनी रविवारी सायंकाळी जोरदार संताप व्यक्त केला. या घटनेनंतर रुग्णालय परिसरात तणावपूर्ण वातावरण निर्माण झाले असून ग्रामस्थांनी 24 तास डॉक्टर उपलब्ध ठेवण्याची मागणी केली आहे.
ताम्हाणे कुळयेवाडी येथील अनुसया शिगवण (वय 85) या रविवारी दुपारी साडेतीनच्या सुमारास घराजवळील लाकडाच्या खोपीतून सरपण काढत असताना विषारी सर्पाने त्यांच्या हाताला दंश केला. सर्पदंश झाल्यानंतर त्यांनी आरडाओरड केली असता स्थानिक ग्रामस्थांनी तत्काळ त्यांना देवरुख ग्रामीण रुग्णालयात दाखल केले.
मात्र, रुग्णालयात पोहोचल्यानंतर सेवेत असलेले डॉक्टर उपस्थित नसल्याने महिलेवर तातडीने उपचार सुरू होऊ शकले नाहीत, असा आरोप नातेवाईक आणि ग्रामस्थांनी केला आहे. काही वेळानंतर ड्युटी संपवून गेलेले डॉ. यादव रुग्णालयात दाखल झाले आणि त्यांनी तपासणी सुरू केली. परंतु तोपर्यंत वृद्ध महिलेचा मृत्यू झाला होता.
रुग्णालयात तणाव, पोलिसांचा हस्तक्षेप
घटनेची माहिती मिळताच संतप्त ग्रामस्थांनी रुग्णालयात एकच गोंधळ घातला. परिस्थिती चिघळू नये म्हणून उपनिरीक्षक जाधव पोलिस बंदोबस्तासह घटनास्थळी दाखल झाले. पोलिसांनी ग्रामस्थांची समजूत काढत परिस्थिती नियंत्रणात आणली.
या घटनेनंतर “रुग्णालयात 24 तास डॉक्टर उपस्थित असलेच पाहिजेत” अशी जोरदार मागणी ग्रामस्थांकडून करण्यात आली. आपत्कालीन परिस्थितीत रुग्णांना तत्काळ उपचार मिळणे आवश्यक असून आरोग्य यंत्रणेतील निष्काळजीपणामुळे एका वृद्धेला जीव गमवावा लागल्याचा आरोप स्थानिकांनी केला आहे.
दरम्यान, या घटनेमुळे देवरुख ग्रामीण रुग्णालयातील आरोग्य व्यवस्थेवर गंभीर प्रश्नचिन्ह निर्माण झाले असून प्रशासनाकडून याबाबत चौकशी होण्याची शक्यता व्यक्त केली जात आहे.
