(कोल्हापूर)
शिवाजी विद्यापीठ यांच्या कुलगुरुपदी डॉ. राजनीश कामत यांची नियुक्ती करण्यात आली आहे. महाराष्ट्राचे राज्यपाल तथा कुलपती जिष्णु देव वर्मा यांनी गुरुवारी या नियुक्तीची अधिकृत घोषणा केली. डॉ. कामत हे सध्या डॉ. होमी भाभा राज्य विद्यापीठ येथे कुलगुरु म्हणून कार्यरत होते. डॉ. राजनीश कामत यांची नियुक्ती पाच वर्षांच्या कालावधीसाठी किंवा वयाची ६५ वर्षे पूर्ण होईपर्यंत, यापैकी जी तारीख आधी येईल त्या कालावधीपर्यंत लागू राहणार आहे.
शिवाजी विद्यापीठाचे माजी कुलगुरु डॉ. दिगंबर शिर्के यांचा कार्यकाळ ७ ऑक्टोबर २०२५ रोजी संपल्यानंतर हे पद रिक्त होते. या कालावधीत सावित्रीबाई फुले पुणे विद्यापीठ चे कुलगुरु डॉ. सुरेश गोसावी यांच्याकडे अतिरिक्त कार्यभार सोपविण्यात आला होता.
निवड समितीच्या शिफारशीनंतर नियुक्ती
नवीन कुलगुरु निवडीसाठी राज्यपालांनी विशेष निवड समिती गठीत केली होती. या समितीचे अध्यक्ष कोईम्बतूर येथील भारतीय विद्यापीठाच्या गणित विभागाचे निवृत्त प्राध्यापक डॉ. पी. कंदास्वामी होते. समितीवर विद्यापीठ अनुदान आयोग चे प्रतिनिधी म्हणून महात्मा गांधी चित्रकूट ग्रामोदय विद्यापीठाचे माजी कुलगुरु प्रा. एन.सी. गौतम, इंदोर येथील आयआयटीचे संचालक डॉ. सुहास जोशी तसेच उच्च व तंत्रशिक्षण विभागाचे अतिरिक्त मुख्य सचिव बी. वेणुगोपाल रेड्डी यांचा समावेश होता. समितीने शिफारस केलेल्या उमेदवारांच्या मुलाखतीनंतर राज्यपालांनी डॉ. कामत यांच्या नावाला अंतिम मंजुरी दिली.
डॉ. राजनीश कामत यांचा शैक्षणिक आणि संशोधन क्षेत्रातील मोठा अनुभव
डॉ. कामत हे शिवाजी विद्यापीठाचेच माजी विद्यार्थी आणि माजी प्राध्यापक आहेत. त्यांनी इलेक्ट्रॉनिक्स विषयात एम.एस्सी. पदवी शिवाजी विद्यापीठातून पूर्ण केली असून गोवा विद्यापीठातून पीएच.डी. प्राप्त केली आहे. अध्यापन, संशोधन आणि शैक्षणिक प्रशासन क्षेत्रात त्यांना दीर्घ अनुभव आहे. त्यांच्या नावावर आंतरराष्ट्रीय जर्नल्समध्ये प्रकाशित झालेली तब्बल २११ संशोधन पत्रके आहेत. तसेच त्यांनी १६ पुस्तकेही लिहिली आहेत.
शिवाजी विद्यापीठाचे १४ वे कुलगुरु म्हणून डॉ. कामत आता पदभार स्वीकारणार असून, त्यांच्या नियुक्तीचे शैक्षणिक वर्तुळातून स्वागत करण्यात येत आहे.
