(मुंबई)
महाराष्ट्रातील शेती व्यवस्थेला डिजिटल बळ देण्यासाठी राज्य सरकारने Agristack (ॲग्रीस्टॅक) योजनेची अंमलबजावणी वेगाने सुरू केली आहे. या उपक्रमाअंतर्गत प्रत्येक शेतकऱ्याला एक युनिक ‘Farmer ID’ दिला जात असून, कृषी विभागाच्या बहुतांश योजनांसाठी तो आता अनिवार्य करण्यात आला आहे. सरकारने स्पष्ट केले आहे की, 20 मे 2026 ही नोंदणीची अंतिम मुदत असेल.
काय आहे Agristack योजना?
Agristack ही केंद्र आणि राज्य सरकारच्या संयुक्त प्रयत्नातून राबवली जाणारी डिजिटल शेती योजना आहे. या योजनेद्वारे शेतकऱ्यांची जमीन, पिकांची माहिती, अनुदान, विमा आणि इतर शासकीय सेवा एकाच डिजिटल प्लॅटफॉर्मवर उपलब्ध होणार आहेत. यामुळे डेटा व्यवस्थापन अधिक अचूक होऊन कृषी धोरणे तयार करणे सोपे होईल.
Farmer ID का महत्त्वाचा?
राज्याच्या कृषी विभागाने 15 एप्रिल 2025 पासून Farmer ID अनिवार्य केला आहे. त्यामुळे खालील सुविधांसाठी हा आयडी आवश्यक ठरणार आहे:
- पीक विमा योजना
- कृषी अनुदान
- बियाणे, खते आणि औषधांचे वितरण
- इतर शासकीय योजना
Farmer ID नसल्यास भविष्यात योजनांचा लाभ घेण्यात अडचणी येऊ शकतात, असा इशारा प्रशासनाने दिला आहे. महाराष्ट्रात सुमारे 1.71 कोटी खातेदार शेतकरी आहेत. यापैकी 1.32 कोटी शेतकऱ्यांनी Farmer ID साठी नोंदणी पूर्ण केली आहे. मात्र अजूनही लाखो शेतकरी नोंदणीपासून दूर असल्याने शासनाने मोहीम गतीमान केली आहे.
Farmer ID साठी नोंदणी कशी कराल?
शेतकरी खालील दोन पद्धतींनी नोंदणी करू शकतात:
- जवळच्या सेवा सुविधा केंद्रात जाऊन
- Agristack पोर्टलवर ऑनलाइन अर्ज करून
आवश्यक कागदपत्रे:
- आधार कार्ड
- मोबाईल नंबर
- जमिनीशी संबंधित कागदपत्रे
डिजिटल शेतीकडे मोठं पाऊल
Farmer ID हा शेतकऱ्यांचा अधिकृत डिजिटल ओळख क्रमांक म्हणून काम करणार आहे. यामुळे अनुदान वितरणात पारदर्शकता वाढेल, फसवणूक कमी होईल आणि सेवा जलद मिळतील. तसेच बियाणे, खते आणि औषधांच्या वितरणातही सुलभता येणार आहे. नोंदणी करताना अडचण आल्यास संबंधित विभागातील सहाय्यक कृषी अधिकाऱ्यांशी संपर्क साधता येईल.
शेतकरी बांधवांनी अंतिम मुदत लक्षात घेऊन लवकरात लवकर Farmer ID नोंदणी पूर्ण करावी, असे आवाहन कृषी विभागाकडून करण्यात आले आहे.
