(संगमेश्वर / एजाज पटेल)
संगमेश्वर तालुक्यातील तुरळ-हरेकर वाडी येथे एका रानगव्याच्या जीवावर आलेल्या संकटातून वनविभागाने दाखवलेली तत्परता आणि माणुसकीचा प्रत्यय देणारी घटना घडली. मानवी वस्तीच्या जवळ आलेला हा मुका जीव २० फूट खोल विहिरीत पडल्याने अक्षरशः मृत्यूच्या दाढेत सापडला होता. मात्र वनविभागाच्या धाडसी आणि नियोजनबद्ध प्रयत्नांमुळे तब्बल सहा तासांच्या संघर्षानंतर त्याला नवजीवन मिळाले.
काळजाचा ठोका चुकवणारी घटना
आज (२० एप्रिल) सकाळी विष्णू हरडे यांच्या विहिरीत काहीतरी पडल्याचा मोठा आवाज झाला. ग्रामस्थांनी धाव घेतली असता, सुमारे १५ बाय २० फूट आकाराच्या आणि २० फूट खोल विहिरीत एक दीड वर्षांचा रानगवा पाण्यात झुंज देताना दिसला. भीतीने व्याकुळ झालेला हा प्राणी बाहेर पडण्यासाठी धडपड करत होता, पण उंच आणि गुळगुळीत भिंतींमुळे तो असहाय झाला होता. याबाबतची माहिती तात्काळ वनविभागाला देण्यात आली.
धाडसी नियोजन आणि जीवावरचा संघर्ष
माहिती मिळताच वनपरिमंडळ अधिकारी सागर गोसावी आणि त्यांच्या टीमने घटनास्थळी धाव घेतली. परिस्थिती अत्यंत गंभीर असल्याने वरिष्ठ अधिकारी गिरीजा देसाई, प्रियंका लगड आणि प्रकाश सुतार यांच्या मार्गदर्शनाखाली बचावकार्याची योजना आखण्यात आली. विहिरीच्या एका बाजूला जेसीबीच्या सहाय्याने उतार तयार करून रानगव्याला बाहेर येण्यासाठी मार्ग बनवण्याचा निर्णय घेण्यात आला.
कडक उन्हात जेसीबीद्वारे खोदकाम सुरू असताना वनविभागाचे कर्मचारी सतत घटनास्थळी तैनात होते. वनरक्षक सुरज तेली, आकाश कडुकर, सुप्रिया काळे आणि सहयोग कराडे यांनी मोठ्या जिद्दीने या मोहिमेत सहभाग घेतला. प्रत्येक क्षण तणावपूर्ण होता, कारण घाबरलेला रानगवा कधीही आक्रमक होऊ शकत होता.
जिद्दीचा विजय
सकाळी साडेनऊ वाजता सुरू झालेली ही मोहीम दुपारी साडेतीनपर्यंत अखंड सुरू होती. अखेर तयार केलेल्या उताराचा वापर करत रानगव्याने बाहेर येण्यात यश मिळवले. विहिरीबाहेर पडताच तो थेट जंगलाच्या दिशेने धावत निसर्गाच्या कुशीत परतला. उपस्थित ग्रामस्थ आणि वनकर्मचाऱ्यांनी सुटकेचा निश्वास टाकत या यशस्वी बचावकार्यास दाद दिली.
वनविभागाचे आवाहन
या घटनेनंतर वनपरिमंडळ अधिकारी सागर गोसावी यांनी नागरिकांना आवाहन करताना सांगितले की, कोणताही वन्यप्राणी संकटात आढळल्यास त्वरित वनविभागाच्या १९२६ या टोल-फ्री क्रमांकावर संपर्क साधावा. वन्यजीवांचे संरक्षण ही सर्वांची सामूहिक जबाबदारी असल्याचे त्यांनी अधोरेखित केले. या धाडसी बचावकार्यातून वनविभागाच्या सजगतेचा आणि निसर्गप्रेमाचा पुन्हा एकदा प्रत्यय आला.
