(रत्नागिरी)
संगमेश्वर तालुक्यातील साखरपा येथे मद्याच्या नशेत एका बिहारी तरुणाने उंदिर मारण्याचे विषारी औषध प्राशन केल्याची घटना घडली आहे. या घटनेमुळे परिसरात खळबळ उडाली असून संबंधित तरुणावर सध्या जिल्हा शासकीय रुग्णालयात अतिदक्षता विभागात उपचार सुरू आहेत.
मिळालेल्या माहितीनुसार, ब्रीजेश बुटी चौधरी (वय २८) असे या तरुणाचे नाव असून तो सध्या साखरपा येथील एसटी बसस्थानकाजवळ राहत होता. मूळचा बिहार राज्यातील शिवान जिल्ह्यातील माधवपूर, तरवारा येथील रहिवासी असलेला ब्रीजेश हा सेन्ट्रींगचे काम करत होता. ही घटना बुधवारी (२४ तारखेला) सकाळी सुमारे आठ वाजण्याच्या सुमारास घडली.
मद्यधुंद अवस्थेत ब्रीजेशने उंदिर मारण्यासाठी वापरले जाणारे विषारी औषध प्राशन केल्याचे प्राथमिक तपासात समोर आले आहे. प्रकृती बिघडल्याचे लक्षात येताच त्याला तात्काळ साखरपा येथील प्राथमिक आरोग्य केंद्रात दाखल करण्यात आले. मात्र, प्रकृती गंभीर असल्याने अधिक उपचारासाठी त्याला रत्नागिरी जिल्हा शासकीय रुग्णालयात हलवण्यात आले. सध्या त्याच्यावर अतिदक्षता विभागात उपचार सुरू असल्याची माहिती डॉक्टरांनी दिली आहे.
या प्रकरणाची नोंद जिल्हा शासकीय रुग्णालयातील पोलिस चौकीत करण्यात आली असून पुढील तपास सुरू आहे. विष प्राशनाचे नेमके कारण काय, याबाबत पोलीस अधिक तपास करत आहेत.
