(रत्नागिरी)
निवडणूक प्रक्रियेच्या अंतिम टप्प्यात मतदान केंद्रस्तरीय पथके मतदान साहित्यांसह संबंधित मतदान केंद्रांकडे रवाना झाली आहेत. बॅलेट युनिट, कंट्रोल युनिट, व्हीव्हीपॅटसह आवश्यक सर्व साहित्य घेऊन अधिकारी, कर्मचारी आणि मतदान पथकांनी आपल्या नेमणूक केलेल्या केंद्रांकडे प्रस्थान केले.
मतदान प्रक्रिया सुरळीत, पारदर्शक आणि निर्भय वातावरणात पार पडावी यासाठी प्रशासनाकडून सर्व तयारी पूर्ण करण्यात आली आहे. मतदान केंद्रांवर आवश्यक मनुष्यबळ, सुरक्षा व्यवस्था तसेच तांत्रिक सहाय्य उपलब्ध करून देण्यात आले असून, प्रत्येक टप्प्यावर काटेकोर नियोजन करण्यात आले आहे.
मतदानादरम्यान ईव्हीएम मशीनमध्ये बिघाड, व्हीव्हीपॅटशी संबंधित तांत्रिक अडचणी किंवा अन्य समस्या उद्भवल्यास त्यावर तात्काळ उपाययोजना करण्यासाठी विशेष तांत्रिक पथकांची नियुक्ती करण्यात आली आहे. ही पथके सतत संपर्कात राहणार असून, आवश्यक ठिकाणी त्वरित पोहोचून अडचणी दूर करण्याचे निर्देश देण्यात आले आहेत.
यासोबतच मतदान केंद्रांवर शांतता व सुव्यवस्था राखण्यासाठी पोलीस यंत्रणेसह सुरक्षा दल सज्ज ठेवण्यात आले आहे. मतदान कर्मचाऱ्यांना आवश्यक सूचना व प्रशिक्षण देण्यात आले असून, मतदारांना कोणत्याही अडचणीशिवाय आपला मतदानाचा हक्क बजावता यावा, यासाठी प्रशासनाकडून सर्वतोपरी प्रयत्न केले जात आहेत.
निवडणूक आयोगाच्या मार्गदर्शक सूचनांनुसार मतदान प्रक्रिया पार पडणार असून, नागरिकांनी निर्भयपणे मतदान केंद्रावर येऊन लोकशाहीच्या या महत्त्वाच्या प्रक्रियेत सहभागी व्हावे, असे आवाहन प्रशासनाच्या वतीने करण्यात आले आहे.
