(चिपळूण/रत्नागिरी प्रतिनिधी)
जिल्ह्यातील चिपळूण तालुक्यात राज्य उत्पादन शुल्क विभागाने मोठी कारवाई करत गोवा निर्मित मद्याचा बेकायदेशीर साठा जप्त केला आहे. ही कारवाई चिपळूण तालुक्यातील वालोपे येथील तांबीटकरवाडी येथे करण्यात आली. या कारवाईत ५ लाख ६७ हजार ८४० रुपये किंमतीचा मुद्देमाल हस्तगत करण्यात आला असून, एका संशयितास अटक करण्यात आली आहे.
ही कारवाई श्रीमती किर्ती शेडगे (अधीक्षक, राज्य उत्पादन शुल्क, रत्नागिरी) यांच्या मार्गदर्शनाखाली पार पडली. विभागाला मिळालेल्या गुप्त माहितीनंतर निरीक्षक श्री. सुनील आरडेकर, जवान शुभम काडापुरे, निखील लोंढे, मयूर पुरीबुवा आणि वाहनचालक विशाल विचारे यांच्या पथकाने संयुक्तरित्या ही कारवाई केली. वालोपे येथील मोहन लक्ष्मण तांबीटकर यांच्या घरातील पडवीत हा बेकायदेशीर साठा आढळून आला. यामध्ये गोवा राज्यात विक्रीसाठी अधिकृत असलेले, मात्र महाराष्ट्रात प्रतिबंधित असलेले एकूण ६३ बॉक्स (५५६.९२ ब.लि.) मद्य जप्त करण्यात आले.
या प्रकरणी प्रवीण गणपत तांबीटकर (रा. वालोपे, तांबीटकरवाडी, ता. चिपळूण, जि. रत्नागिरी) याला अटक करण्यात आली असून, त्याच्याविरुद्ध गुन्हा क्र. १५०/२०२५ नोंदवण्यात आला आहे. त्याच्यावर महाराष्ट्र दारूबंदी कायदा १९४९ अंतर्गत कलम ६५ (ई) आणि ९० प्रमाणे गुन्हा दाखल करण्यात आला आहे. या गुन्ह्याचा पुढील तपास निरीक्षक श्री. सुनील आरडेकर करत आहेत.
उत्पादन शुल्क विभागाकडून नागरिकांना आवाहन
जिल्ह्यात कुठेही हातभट्टी दारूची निर्मिती, विक्री, परराज्यातून अवैध मद्याची वाहतूक अथवा साठा, बनावट माडी विक्री होत असल्याचे आढळल्यास, नागरिकांनी तत्काळ राज्य उत्पादन शुल्क विभागाशी (व्हॉट्सअँप क्रमांक ८४२२००११३३ टोलफ्री क्रमांक: १८००२३३९९९९ ) संपर्क साधावा, असे आवाहन करण्यात आले असून माहिती देणाऱ्याचे नाव गुप्त ठेवले जाईल, असे विभागाने स्पष्ट केले आहे.
