(रत्नागिरी)
जिल्हा परिषद आणि पंचायत समिती निवडणुकीसाठी सुरू असलेला प्रचार काल (दि. ५) संपला. त्यामुळे संपूर्ण तालुक्यातील राजकीय वातावरण अत्यंत निर्णायक बनले आहे. गेल्या काही दिवसांत जिल्हा परिषदेच्या गट आणि पंचायत समितीच्या गणांमध्ये उमेदवार आणि पक्षीय हालचालींनी जोर धरला होता, आणि प्रचाराच्या शेवटच्या दिवशी हा टप्पा सर्वोच्च गतीने पार पडला.
प्रचाराच्या अखेरच्या दिवशी विविध पक्षांचे उमेदवार मतदारांपर्यंत पोहोचण्यासाठी अखेरच्या प्रयत्नांत व्यस्त होते. पंचायत समितीच्या प्रत्येक गणामध्ये स्थानिक राजकारणाची तीव्र लढत रंगली. या लढतीत पक्षीय ताकदीसोबतच स्थानिक नेतृत्व, संघटन कौशल्य आणि मतदारांशी थेट संपर्क यालाही महत्त्व प्राप्त झाले आहे.
उमेदवारांनी गावांमध्ये बैठकांचे आयोजन केले, जेवणावळी, संवाद कार्यक्रम आणि मतदारांशी थेट चर्चा करून आपली बाजू समजावून सांगण्याचे प्रयत्न केले. प्रचारातील खर्च, आश्वासने आणि निवडणूक व्यवस्थापन यावरूनही राजकीय चर्चांना गती मिळाली. “लोकप्रतिनिधी निवडताना कामगिरी, विश्वासार्हता आणि जनसंपर्काला प्राधान्य द्यावे की पक्षीय ताकदीला महत्त्व द्यावे?” हा मतदारांमध्ये कमालीचा चर्चेचा विषय झाला होता.
जिल्हा परिषद आणि पंचायत समिती निवडणुकीचा निकाल स्थानिक राजकारणाची दिशा ठरवणारा असतो. मतदानाच्या दिवशी उमटणारा मतांचा कौल तालुक्याच्या अपेक्षा, समस्या आणि विकासाच्या दिशेचे प्रतिबिंब ठरेल. प्रचाराच्या शेवटच्या दिवशी मतदारांनी उमेदवारांची कामगिरी, आश्वासने आणि सामाजिक योगदान यावर विचार निर्णय घेण्याचे बोलून दाखवले.
या निवडणुकीतून निवडून येणारे लोकप्रतिनिधी तालुक्यातील विकास, पायाभूत सुविधा, शिक्षण, आरोग्य आणि सामाजिक प्रश्नांवर कोणती दिशा ठरवतात, याकडे सर्वांचे लक्ष लागले आहे. त्यामुळे ही निवडणूक फक्त राजकीय पक्षांसाठी नव्हे तर तालुक्याच्या भवितव्यासाठी निर्णायक मानली जात आहे.
