(कणकवली)
सिंधुदुर्ग जिल्ह्याच्या राजकारणात मोठी घडामोड झाली आहे. जिल्हा बँकेचे माजी अध्यक्ष आणि कणकवली विधानसभा प्रमुख सतीश सावंत यांनी ठाकरे गट शिवसेनेला सोडून भारतीय जनता पक्षात (भाजप) प्रवेश केला आहे. हा ऐतिहासिक निर्णय रविवारी हरकुळ खुर्द येथे झालेल्या भव्य समारंभात, पालकमंत्री नितेश राणे यांच्या उपस्थितीत जाहीर करण्यात आला.
सावंत यांच्यासोबत माजी पंचायत समिती सदस्य मंगेश सावंत, विविध गावांचे सरपंच आणि असंख्य कार्यकर्त्यांनी भाजपचा झेंडा खांद्यावर घेतला. या प्रवेशामुळे कणकवली मतदारसंघात भाजपची ताकद दुपटीने वाढली आहे.
ठाकरेंच्या शिवसेनेला मोठा धक्का
सतीश सावंत हे फक्त नेते नाहीत, तर ठाकरे शिवसेनेचे विधानसभा अध्यक्ष देखील होते. त्यांच्या बरोबर हरकुळ खुर्दचे सरपंच आनंद ठाकूर, भिरवडे सरपंच नितीन सावंत आणि बेनी डिसोझा यांनी पक्ष सोडल्यानंतर ठाकरे गटाची स्थानिक फळी खिळखिळी झाली आहे. निवडणुकीच्या रणधुमाळीपूर्वीच ही गळती पक्षासाठी चिंतेचा विषय ठरत आहे.
भाजपसाठी फायदा आणि विकासाचा फोकस
जिल्हा बँकेच्या माजी अध्यक्ष म्हणून सतीश सावंत यांचा सहकार क्षेत्रावर मोठा प्रभाव आहे. भाजपमध्ये प्रवेश केल्यामुळे जिल्हा बँक, विकास सोसायट्या आणि ग्रामीण भागातील अर्थकारणावर भाजपचे वर्चस्व अधिक घट्ट होणार आहे.
पालकमंत्री नितेश राणे यांनी या वेळी सांगितले, “विकासकामांच्या जोरावर जिल्ह्याचा कायापालट करण्यासाठी आम्ही सतीश सावंतांचे स्वागत करतो.”
सतीश सावंत हे एकेकाळी राणे कुटुंबाचे अत्यंत विश्वासू सहकारी म्हणून ओळखले जात होते. राजकीय मतभेदांमुळे त्यांनी मधल्या काळात ठाकरे गटाची वाट धरली होती. मात्र, आता पुन्हा एकदा मंत्री नितेश राणे यांच्या नेतृत्वाखाली भाजपमध्ये पुनरागमन केल्याने त्यांची ‘घरवापसी’ झाली, अशी जोरदार चर्चा राजकीय वर्तुळात सुरू आहे. या निर्णयामुळे ठाकरे शिवसेनेसाठी कणकवलीमध्ये राजकीय सुरुंग निर्माण झाला असून, आगामी विधानसभा निवडणुकांसाठी हे मोठे निर्णायक बदल मानले जात आहेत.
दरम्यान, या पक्षप्रवेश सोहळ्यास भाजपचे जिल्हाध्यक्ष प्रभाकर सावंत, तालुका अध्यक्ष मिलिंद मेस्त्री, दिलीप तळेकर, मनोज रावराणे, बबलू सावंत यांच्यासह भाजपचे अनेक ज्येष्ठ नेते व कार्यकर्ते उपस्थित होते.
