(नागपूर)
शिक्षक भरती घोटाळा प्रकरणात आणखी एक मोठी कारवाई करत विशेष तपास पथकाने (SIT) नागपूर जिल्हा परिषदेचे माजी शिक्षणाधिकारी रवींद्र शंकरराव काटोलकर यांना अटक केली आहे. ‘शालार्थ’ ऑनलाइन वेतन प्रणालीच्या गैरवापरातून तब्बल 12 कोटी रुपयांहून अधिक रकमेची फसवणूक केल्याचा आरोप त्यांच्यावर ठेवण्यात आला आहे.
मिळालेल्या माहितीनुसार, हा घोटाळा शालार्थ ऑनलाइन वेतन प्रणालीचा बेकायदेशीर वापर करून करण्यात आला. आरोपींनी संगनमताने बनावट शालार्थ आयडी आणि ड्राफ्ट तयार केले. प्रत्यक्षात अस्तित्वात नसलेल्या किंवा अपात्र शिक्षक आणि शिक्षकेतर कर्मचाऱ्यांच्या नावाने वेतन व इतर आर्थिक देणी काढून शासनाची कोट्यवधी रुपयांची फसवणूक करण्यात आल्याचे तपासात उघड झाले आहे.
नागपूर विभागाच्या शिक्षण उपसंचालक कार्यालयाकडून प्राप्त झालेल्या तक्रारीनंतर हा प्रकार समोर आला. त्या आधारे सायबर पोलिस ठाण्यात फसवणुकीसह विविध कलमांखाली गुन्हा दाखल करण्यात आला असून प्रकरणाचा तपास एसआयटीकडून सुरू आहे. तपासात शालार्थ प्रणालीचा गैरवापर करून बनावट शिक्षक व कर्मचाऱ्यांच्या नावाने वेतन काढण्यात आल्याचे स्पष्ट झाले आहे.
या प्रकरणी मंगळवारी रवींद्र काटोलकर यांना अटक करून न्यायालयात हजर करण्यात आले. न्यायालयाने त्यांना 25 डिसेंबरपर्यंत पोलीस कोठडी सुनावली आहे. तपासात असे निष्पन्न झाले की, 2021 ते 2022 या कालावधीत नागपूर जिल्हा परिषदेत शिक्षणाधिकारी पदावर कार्यरत असताना, बनावट ओळखपत्रांची माहिती असूनही कोणतीही चौकशी न करता पगाराचे प्रस्ताव मंजूर करण्यात आले. वैयक्तिक फायद्यासाठी सरकारी तिजोरीचे नुकसान केल्याचा ठपका त्यांच्यावर ठेवण्यात आला आहे.
या शिक्षक भरती घोटाळ्यात आतापर्यंत एकूण 26 आरोपींना अटक करण्यात आली आहे. यामध्ये शिक्षण उपसंचालक, शिक्षण अधिकारी, लिपिक, शाळांचे मुख्याध्यापक, शाळा संचालक आणि शिक्षक यांचा समावेश आहे. सर्व आरोपींविरोधात प्रथम श्रेणी न्यायदंडाधिकारी न्यायालय क्रमांक 10 मध्ये आरोपपत्र दाखल करण्यात आले आहे.
