(राजापूर)
राजापूर नगर परिषदेची निवडणूक रंगात आली असून, महाविकास आघाडीने एकत्रितपणे लढण्याची घोषणा करून निवडणुकीचे रणशिंग फुंकले आहे. आज राजापूर येथील काँग्रेस कार्यालयात आयोजित संयुक्त पत्रकार परिषदेत या निर्णयाची अधिकृत घोषणा करण्यात आली.
या पत्रकार परिषदेत शिवसेना (उद्धव बाळासाहेब ठाकरे) गटाचे नेते व माजी आमदार गणपतराव कदम, काँग्रेसच्या माजी विधानपरिषद सदस्या ऍड. हुस्नाबानू खलिफे, तसेच शिवसेना ठाकरे गटाचे विधानसभा क्षेत्र संपर्कप्रमुख ऍड. चंद्रप्रकाश नकाशे यांच्यासह आघाडीतील प्रमुख नेते उपस्थित होते.
महाविकास आघाडीचा निर्धार
राजापूर नगर परिषद निवडणुकीत शिवसेना (उबाठा), काँग्रेस, राष्ट्रवादी काँग्रेस (शरद पवार गट) आणि महाराष्ट्र नवनिर्माण सेना (मनसे) हे चारही पक्ष एकत्रितपणे लढणार असल्याचे नेत्यांनी स्पष्ट केले.
माजी आमदार गणपतराव कदम म्हणाले, “पूर्वी राजापूर तालुक्यात शिवसेना आणि काँग्रेस एकमेकांच्या विरोधात उभे राहत होते, पण आज नियतीने आम्हाला एकत्र आणले आहे. या निवडणुकीत आम्ही महाविकास आघाडी म्हणून सर्व वीस जागा लढवणार असून नगराध्यक्ष पदासह स्पष्ट बहुमत मिळवू.”
त्यांनी पुढे सांगितले की, नगराध्यक्षपदासाठीचा उमेदवार निश्चित झाला असून त्याची घोषणा वरिष्ठ पातळीवरून लवकरच होणार आहे.
काँग्रेस नेत्या ऍड. खलिफे यांचे स्पष्टीकरण
माजी विधानपरिषद सदस्या ऍड. हुस्नाबानू खलिफे म्हणाल्या, “निवडून येणारा उमेदवार हेच आमचे सूत्र आहे. आम्ही महाविकास आघाडी म्हणून निवडणूक लढवत आहोत आणि विविध सामाजिक संस्था, पतसंस्था, बँका व मंडळांचा पाठिंबा मिळवण्यासाठीही संवाद सुरू आहे.”
काँग्रेसमधील काही सदस्य शिंदे गटाच्या संपर्कात असल्याच्या वृत्ताबाबत विचारले असता त्या म्हणाल्या, “कोण कुणाला भेटले म्हणजे तो पक्षप्रवेश होत नाही. आम्ही आघाडीत आहोत आणि आघाडीचाच विजय निश्चित आहे.”
शिवसेना ठाकरे गटाचे राजापूर विधानसभा संपर्कप्रमुख ऍड. चंद्रप्रकाश नकाशे म्हणाले, “राजापूर नगर परिषद निवडणुकीत महाविकास आघाडी सर्व जागांवर विजयी ठरेल आणि राजापूर नगर परिषदेवर आघाडीचाच झेंडा फडकेल.”
या पत्रकार परिषदेस काँग्रेस तालुकाध्यक्ष जितेंद्र खामकर, शिवसेना (उबाठा) तालुका प्रमुख कमलाकर कदम, माजी नगराध्यक्ष ऍड. जमीर खलिफे, माजी तालुकाध्यक्ष सुभाष बाकाळकर, रामचंद्र सरवणकर, अनिल कुडाळी, संजय पवार, अभय मेळेकर, मनसेचे श्री. पवार, आणि काँग्रेस शहराध्यक्ष अजीम जैतापकर यांसह आघाडीतील अनेक पदाधिकारी उपस्थित होते.
फोटो:
महाविकास आघाडीच्या वतीने आयोजित पत्रकार परिषदेत बोलताना माजी आमदार गणपतराव कदम, माजी विधानपरिषद सदस्या ऍड. हुस्नाबानू खलिफे, तसेच शिवसेना ठाकरे गटाचे संपर्कप्रमुख ऍड. चंद्रप्रकाश नकाशे यांच्यासह आघाडीचे पदाधिकारी.
