( चिपळूण )
चिपळूण–कराड मार्गावरील सती येथे काही दिवसांपूर्वी झालेल्या दुचाकी अपघातात गंभीर जखमी झालेला सागर विजय गमरे (वय २६, रा. वेहेळे) या अष्टपैलू कबड्डीपटूचा उपचारादरम्यान मृत्यू झाला. कराड येथील रुग्णालयात मृत्यूशी त्याची झुंज अपयशी ठरल्याने वेहेळे गाव आणि कबड्डी क्षेत्रात शोककळा पसरली आहे.
घटनेची माहिती अशी की, शुक्रवारी सागर गमरे हा वेहेळे येथून दुचाकीवरून चिपळूण बाजारपेठेकडे येत असताना सती परिसरात त्याची दुचाकी दुसऱ्या दुचाकीवर आदळली. या अपघातात तो गंभीर जखमी झाला होता. स्थानिकांनी त्याला तातडीने चिपळूण येथील खासगी रुग्णालयात दाखल केले. मात्र, अधिक उपचारांसाठी त्याला कराड येथे हलवण्यात आले. तेथे उपचार सुरू असताना सोमवारी सकाळी त्याने अखेरचा श्वास घेतला.
सागर गमरे हा ‘भीम संघर्ष वेहेळे’ या स्थानिक कबड्डी संघातून अनेक वर्षे खेळत होता. त्याच्या सर्वांगसुंदर आणि दमदार खेळामुळे त्याने ग्रामीण स्तरावर वेगळी ओळख निर्माण केली होती. अनेक स्पर्धांमध्ये त्याच्या उत्कृष्ट कामगिरीमुळे संघाने यश संपादन केले होते.
काही वर्षांपूर्वीच आई-वडिलांचे छत्र हरपलेल्या सागरच्या अकाली निधनामुळे वेहेळे गावावर दुःखाचा डोंगर कोसळला आहे. सोमवारीच वेहेळे गावात त्याच्यावर शोकाकुल वातावरणात अंत्यसंस्कार करण्यात आले.
