निरोगी जीवनशैलीसाठी लोक योगा, व्यायाम, धावणे आणि चालण्याचा अवलंब करतात. चालणं हे आरोग्यासाठी नेहमीच फायदेशीर मानलं जातं. मात्र आता जगभरात एक नवीन ट्रेंड लोकप्रिय होत आहे तो म्हणजे उलट चालणं. उद्यानात किंवा रस्त्यावर तुम्ही अनेकदा काही लोकांना सरळ चालण्याऐवजी मागे चालताना पाहिलं असेल. हे फक्त गंमत म्हणून नाही, तर आरोग्यासाठी उपयुक्त ठरतं.
उलट चालण्याचे फायदे
-
मेंदू आणि पायांचा व्यायाम – मागे चालल्याने मेंदूला नवा सिग्नल मिळतो. त्यामुळे पाय आणि मेंदूमध्ये समन्वय वाढतो व मानसिक चपळता सुधारते.
-
डायबेटीस आणि बीपीसाठी लाभदायी – नियमित उलट चालल्याने रक्तदाब आणि रक्तातील साखर नियंत्रणात ठेवण्यास मदत होते.
-
पायांना बळकटी – मागे चालल्यामुळे पायांचे स्नायू मजबूत होतात आणि पायांची ताकद वाढते.
-
वजन कमी करण्यास मदत – वजन कमी करू इच्छिणाऱ्यांसाठी हा एक सोपा आणि प्रभावी व्यायाम आहे.
-
पाठदुखीपासून आराम – पाठीच्या दुखण्याने त्रस्त असणाऱ्यांना या व्यायामाचा फायदा होऊ शकतो.
आपण दररोज सामान्यपणे सरळ चालतो तेव्हा आपण काहीही विचार न करता पुढे पाऊल टाकत असतो. परंतु जेव्हा आपण मागे पाऊल टाकतो तेव्हा ते आपल्या पायांची सहनशक्ती आणि एरोबिक क्षमता जलद सुधारण्यास मदत करू शकते. मागे चालताना ट्रेडमिल किंवा घरामध्ये प्रयोग करणे अधिक सुरक्षित मानले जाते.
किती वेळ चालावे?
उलट चालण्यास सुरुवात करताना दिवसातून केवळ पाच मिनिटे पुरेशी आहेत. सुरुवातीला हळूहळू मागे चालण्याचा सराव करावा, कारण तोल सांभाळणे महत्त्वाचे असते. काही दिवसांनी सवय झाली की चालण्याचा वेग आणि वेळ दोन्ही वाढवता येतात.
घ्यावयाची काळजी
-
नेहमी सपाट आणि मोकळ्या जागेवरच उलट चालावे.
-
मागे दगड, खड्डे किंवा अडथळे नाहीत याची खात्री करून मगच चालावे.
-
ज्यांना पाय किंवा गुडघ्यांच्या समस्या आहेत, त्यांनी हा व्यायाम टाळावा.
उलट चालणं ही साधी पण वेगळी व्यायाम पद्धत असून ती शरीर आणि मन दोन्ही तंदुरुस्त ठेवू शकते. अनेक देशांमध्ये हा “रिव्हर्स वॉकिंग ट्रेंड” लोकप्रिय होत असून, आरोग्य जपण्यासाठी ही एक सोपी आणि परिणामकारक सवय ठरू शकते.
