(दापोली)
जिल्हा परिषद प्राथमिक शाळांमधील प्रत्येक विद्यार्थ्यांमध्ये वाचन-लेखन कौशल्य विकसित व्हावे, यासाठी प्रकट वाचन आणि श्रुतलेखनावर विशेष भर द्यावा, असे आवाहन कोळबांद्रे समूह साधन केंद्राचे समन्वयक संजय जंगम यांनी केले.
गावतळे येथील जि.प. आदर्श शाळेत आयोजित शिक्षण परिषदेत ते शिक्षकांना मार्गदर्शन करीत होते. गावतळे हायस्कूलच्या मुख्याध्यापिका भक्ती सावंत यांच्या अध्यक्षतेखाली परिषद पार पडली. कार्यक्रमाच्या सुरुवातीला हायस्कूलच्या विद्यार्थिनींनी मंत्रमुग्ध करणारे स्वागत सादर केले.
यावेळी मार्गदर्शक राहुल बडे यांनी खान अॅकॅडमी तसेच शिक्षण प्रक्रियेबाबत सखोल मार्गदर्शन केले. प्रशासकीय मार्गदर्शनात जंगम यांनी शालेय प्रगतीसाठी व्हिजन दापोली, निपूण महाराष्ट्र, जातीचे दाखले, आधार अपडेट, तसेच विविध शालेय योजना यांचा उल्लेख करून सर्व शाळांनी वेळेत पूर्तता करावी, असे आवाहन केले.
कार्यक्रमाचे सूत्रसंचालन सत्यप्रेम घुगे यांनी केले. परिषदेत नव्याने नियुक्त झालेल्या शिक्षकांचे स्वागतही करण्यात आले.
या प्रसंगी गावतळेच्या सरपंच विधी पवार, तंटामुक्त समिती अध्यक्ष वसंत पवार, शाळा व्यवस्थापन समिती अध्यक्षा सोनाली पवार, उपाध्यक्ष विनोद पवार, तसेच संजय मेहता, शामराव वरेकर, महेंद्र कलमकर, मनोहर सनवारे आदी मान्यवर उपस्थित होते.
