(देवरूख)
वन्यप्राण्यांची शिकार करण्याच्या उद्देशाने विनापरवाना शस्त्र बाळगल्याप्रकरणी देवरूख पोलिसांनी दोन तरुणांना ताब्यात घेतले आहे. या कारवाईमुळे स्थानिक नागरिकांनी समाधान व्यक्त केले असून, पोलिसांच्या तत्परतेचे कौतुक होत आहे.
रात्री गस्त घालताना मौजे विघ्रवली एस.टी. बसस्टॉपजवळ देवरूख–सोनवडे रस्त्यावर डोक्यावर बॅटरी लावून दोन स्कुटरस्वार पोलिसांना दिसले. संशयास्पद हालचालींमुळे हेड कॉन्स्टेबल अभिषेक वेलणकर आणि सचिन कामेरकर यांनी चौकशी केली असता, समर्पक उत्तर न दिल्याने अधिक तपास करण्यात आला. त्यात एकाकडे गावठी बंदूक व जिवंत काडतूस आढळले.
अटक केलेल्या तरुणांची नावे प्रितेश प्रतिपाल आडाव (२६, रा. कांजीवरा, देवरूख) आणि साहिल संतोष कदम (१९, रा. ओझरे बौद्धवाडी) अशी आहेत. दोघेही वन्यप्राण्यांची शिकार करण्याच्या उद्देशाने फिरत असल्याचे पोलिस तपासात स्पष्ट झाले आहे. या कारवाईत दुचाकी, गावठी बंदूक, जिवंत काडतूस व बॅटरी जप्त करण्यात आली.
या दोघांवर भारतीय हत्यार अधिनियम १९५९ चे कलम ३(१)/२५ व बीएनएस २०२३ चे कलम ३(५) अंतर्गत गुन्हा दाखल करण्यात आला आहे.
जिल्हा पोलीस अधीक्षक नितीन बगाटे यांनी वन्यप्राण्यांची शिकार करण्याच्या उद्देशाने फिरणाऱ्यांवर कठोर कारवाई करण्याचे आदेश दिले आहेत. उपविभागीय पोलीस अधिकारी सुरेश कदम यांच्या सूचना आणि पोलीस निरीक्षक उदय झावरे यांच्या मार्गदर्शनाखाली ही कारवाई पार पडली.
या मोहिमेत पोलीस हेडकॉन्स्टेबल प्रशांत मसूरकर, चालक सचिन पवार यांच्यासह हेडकॉन्स्टेबल अभिषेक वेलणकर व सचिन कामेरकर यांनी सक्रिय भूमिका बजावली.
