(मुंबई)
येत्या २७ ऑगस्टपासून गणेशोत्सवाला सुरुवात होत असून, मुंबई, ठाणे आणि पालघरमधून कोकणात जाणाऱ्या गणेशभक्तांसाठी महाराष्ट्र राज्य मार्ग परिवहन महामंडळाने (एसटी) विशेष तयारी केली आहे. परिवहनमंत्री व एसटी महामंडळाचे अध्यक्ष प्रताप सरनाईक यांनी याबाबत माहिती दिली.
एसटी महामंडळाकडून ५२०० जादा बसेस
गणेशोत्सवाच्या पार्श्वभूमीवर २३ ऑगस्ट ते ७ सप्टेंबर २०२५ या कालावधीत ५२०० विशेष एसटी बसगाड्या कोकणासाठी सोडण्यात येणार आहेत. यामध्ये ४४७९ बसेस गट आरक्षणासाठी उपलब्ध असून, आतापर्यंत एकूण ५१०३ बसेस पूर्णपणे बुक झाल्या आहेत. या बसगाड्या मुंबई, ठाणे आणि पालघरमधील प्रमुख बसस्थानकांवरून कोकणातील विविध गावांपर्यंत धावणार आहेत.
प्रवाशांसाठी सवलती आणि आरक्षण सुविधा
प्रवाशांच्या सोयीसाठी वैयक्तिक आणि गट आरक्षणाची सुविधा उपलब्ध करण्यात आली आहे.
- अमृत ज्येष्ठ नागरिकांना १००% तिकीट सवलत
- ज्येष्ठ नागरिक आणि महिलांना ५०% तिकीट सवलत
या सवलतीमुळे गणेशभक्तांना परवडणाऱ्या दरात आपल्या गावी पोहोचणे शक्य होणार आहे.
गणेश भक्तांचा प्रवास सुखकर व्हावा म्हणून 23 ऑगस्ट ते 7 सप्टेंबर या काळात एसटीची वाहतूक सुरळीत होण्यासाठी बसस्थानक व बसथांब्यावर एसटीच्या वरिष्ठ अधिकाऱ्यांच्या देखरेखीखाली कर्मचारी अहोरात्र कार्यरत राहणार आहेत. तसेच कोकणातील महामार्गावर ठिकठिकाणी वाहन दुरुस्ती पथक देखील तैनात करण्यात येणार आहेत. त्याचबरोबर प्रवाशांना नैसर्गिक विधीसाठी तात्पुरत्या स्वरूपाची प्रसाधानगृह उभारण्यात येणार आहेत, अशी माहिती देत मंत्री सरनाईक पुढे म्हणाले, “गणपती बाप्पा, कोकणवासीय आणि एसटी यांचं नातं अतूट आहे. कोकणातील वाड्या-वस्त्यांपर्यंत पोहचणारी एसटी ही एकमेव वाहतूक सेवा आहे”
प्रवाशांच्या सुविधांसाठी विशेष व्यवस्था
प्रवास अधिक सुखकर आणि सुरक्षित होण्यासाठी खास उपाययोजना करण्यात आल्या आहेत.
- २३ ऑगस्ट ते ७ सप्टेंबरदरम्यान बसस्थानकांवर वरिष्ठ अधिकारी आणि कर्मचारी अहोरात्र कार्यरत राहणार
- कोकणातील महामार्गांवर वाहन दुरुस्ती पथकं तैनात
- काही ठिकाणी प्रवाशांसाठी तात्पुरती प्रसाधनगृहे उभारली जाणार
कोणकोणत्या ठिकाणांहून विशेष गाड्या
मुंबई सेंट्रल, गिरगाव, महालक्ष्मी, दादर, जोगेश्वरी, कुर्ला-नेहरूनगर, अंधेरी, सांताक्रुझ, विलेपार्ले, वांद्रे, भांडूप, मुलुंड, ठाणे-लोकमान्य नगर, कल्याण-डोंबिवली, अंबरनाथ, बदलापूर, वसई, विरार, पनवेल, उरण आदी ठिकाणांहून या विशेष बसगाड्या सोडल्या जाणार आहेत.
राजकीय पक्षांची मोफत बससेवा
एसटी महामंडळाच्या तयारीसोबतच, आगामी निवडणुकांचा विचार करून विविध राजकीय पक्षांनी कोकणवासीयांसाठी मोफत बससेवेची घोषणा केली आहे.
- मुंबई, नवी मुंबई, ठाणे, वसई-विरार, मिरा-भाईंदर, कल्याण-डोंबिवली इ. भागांतून हजारो मोफत बसगाड्या कोकणात धावणार
- इच्छुक नागरिकांकडून आधार कार्ड आणि मतदार ओळखपत्राच्या आधारे अर्ज स्वीकारले जात आहेत
- काही ठिकाणी थेट कार्यालयात नोंदणी, तर काही ठिकाणी व्हॉट्सअॅपद्वारे अर्ज करण्याची सोय करण्यात आली आहे
एसटी महामंडळ आणि स्थानिक प्रशासनाच्या संयुक्त प्रयत्नांमुळे यंदाचा गणेशोत्सव कोकणवासीयांसाठी अधिक सुलभ, सुरक्षित आणि आनंददायी ठरणार आहे. प्रताप सरनाईक यांनी सर्व गणेशभक्तांना शुभेच्छा देत प्रवास काळजीपूर्वक आणि नियोजनबद्ध करण्याचे आवाहन केले आहे.
