(मुंबई)
रहस्य, हास्य आणि कौटुंबिक भावबंध यांचा सुंदर मेळ साधणारा नवा मराठी सिनेमा “स्मार्ट सुनबाई” प्रेक्षकांच्या भेटीस येत आहे. दिग्दर्शक शिवाजी दोलताडे यांच्या दिग्दर्शनाखाली, निर्माते गोवर्धन दोलताडे आणि गार्गी यांच्या निर्मितीतील हा चित्रपट संपूर्ण महाराष्ट्रात २१ नोव्हेंबर २०२५ रोजी प्रदर्शित होणार आहे. सह-निर्माता कार्तिक दोलताडे पाटील असून, नुकतेच प्रदर्शित झालेले पोस्टर प्रेक्षकांच्या उत्सुकतेत भर घालणारे ठरले आहे.
पोस्टरवर काही कलाकार शहरी लुकमध्ये तर काही ग्रामीण पार्श्वभूमीत झळकताना दिसतात. या वैविध्यामुळे कथेतील गूढतेला अधोरेखित करण्यात आले आहे. त्यामुळे प्रेक्षकांच्या मनात “ही स्मार्ट सुनबाई कोण आणि तिच्या आयुष्यात नेमकं काय घडणार?” असा प्रश्न निर्माण झाला आहे.
या सिनेमात रोहन पाटील, संतोष जुवेकर, भाऊ कदम, मोहन जोशी, दीपक शिर्के, अंशुमन विचारे, विनम्र बाबल, सायली देवधर, प्राजक्ता गायकवाड, किशोरी शहाणे, उषा नाईक यांसारखे दिग्गज आणि लोकप्रिय कलाकार एकत्र झळकणार आहेत. कलाकारांची दमदार केमिस्ट्री हा सिनेमाचा मोठा आकर्षणबिंदू ठरणार आहे.
कथा व लेखन योगेश शिरसाट यांचे असून, संगीतकार विजय नारायण गवंडे आणि साई–पियुष यांनी आकर्षक संगीत दिले आहे. गीतकार वैभव देशमुख आणि अदिती द्रविड यांच्या गीतांना अजय गोगावले, वैशाली माढे, आनंदी जोशी, सावनी रवींद्र आणि उर्मिला धनगर यांनी स्वर दिले आहेत. त्यामुळे या चित्रपटात संगीत, अभिनय आणि कथानक यांचा अनोखा संगम मोठ्या पडद्यावर अनुभवायला मिळणार आहे.
दिग्दर्शक शिवाजी दोलताडे यांच्या मते, “प्रत्येक सुनेला स्मार्ट सुनबाई बनण्यासाठी हा चित्रपट प्रेरणादायी ठरेल.” रहस्य, थरार, हास्य आणि कौटुंबिक नातेसंबंधांचा उत्तम मिलाफ असलेला “स्मार्ट सुनबाई” २१ नोव्हेंबरपासून महाराष्ट्रातील चित्रपटगृहांमध्ये प्रेक्षकांचे मनोरंजन करायला सज्ज आहे.
