(चिपळूण)
मुंबई–गोवा महामार्गावरील भोस्ते घाटातील अवघड वळणावर रविवारी रात्री उशिरा झालेल्या भीषण अपघातात कंटेनर चालकाचा जागीच मृत्यू झाला. शौकिन (वय ३३, रा. राजस्थान) असे मृत चालकाचे नाव असून, अपघातामुळे महामार्गावरील वाहतूक काही काळ ठप्प झाली.
पोलिसांच्या माहितीनुसार, शौकिन हे आपल्या ताब्यातील कंटेनर (एमएच ०३ सीके ४२०८) घेऊन गोव्याहून मुंबईकडे निघाले होते. रात्री सुमारे ११ वाजता भोस्ते घाटातील एका वळणावर वाहनावरील नियंत्रण सुटल्याने कंटेनरने समोरून येणाऱ्या कारला (एमएच ०८ एएक्स ९३४८) जोरदार धडक दिली. धडकेनंतर कंटेनर संरक्षक भिंतीवर आदळून चक्काचूर झाला. चालक खाली कोसळताच चाकाखाली चिरडला गेला आणि त्याचा जागीच मृत्यू झाला.
अपघाताची माहिती मिळताच पोलिसांनी घटनास्थळी धाव घेतली. मदत ग्रुपचे अध्यक्ष प्रसाद गांधी व सहकारी देखील मदतीसाठी हजर झाले. मृतदेह कंटेनरच्या चाकाखाली अडकलेला असल्याने क्रेनच्या साहाय्याने बाहेर काढण्यात आला. दरम्यान, ठिकाणी एकेरी वाहतूक सुरू ठेवण्यात आली. अथक प्रयत्नांनंतर मृतदेह बाहेर काढण्यात पोलिसांना यश आले.
या अपघातामुळे महामार्गावरील वाहतूक तात्पुरती ठप्प झाली होती. वाहतूक पूर्ववत झाल्यानंतर अडकलेल्या वाहनचालकांनी सुटकेचा निःश्वास सोडला. भोस्ते घाटातील या वळणावर वारंवार होणाऱ्या अपघातांमुळे वाहनचालकांच्या सुरक्षिततेचा प्रश्न पुन्हा ऐरणीवर आला आहे. तरीही राष्ट्रीय महामार्ग विभागाकडून ठोस उपाययोजना न केल्याने वाहनचालकांमध्ये भीतीचे वातावरण कायम आहे.
