(दापोली)
दापोली–खेड मार्गावरील हिल टॉप परिसरात गुरुवारी सकाळच्या सुमारास बोलेरो गाडीचा भीषण अपघात घडला. बांधकाम साहित्य घेऊन खेडकडे जात असलेली बोलेरो गाडी उतारावरून जाताना ब्रेक फेल झाल्याची शक्यता वर्तवण्यात आली आहे. त्यामुळे नियंत्रण सुटून गाडी थेट रस्त्यालगतच्या शेतात जाऊन आदळली.
अपघातात गाडीचा पुढचा भाग पूर्णतः चुराडा झाला, मात्र सुदैवाने चालकास कोणतीही गंभीर दुखापत झाली नाही. गाडीत चालक एकटाच होता आणि वेळीच प्रतिसाद मिळाल्यामुळे मोठा अनर्थ टळला.
अपघाताची माहिती मिळताच स्थानिक ग्रामस्थांनी तात्काळ घटनास्थळी धाव घेऊन मदतकार्य सुरू केले. काही वेळ वाहतूक विस्कळीत झाली होती, मात्र पोलिसांनी घटनास्थळी पोहोचून वाहतूक सुरळीत केली. या घटनेची नोंद संबंधित पोलिस ठाण्यात करण्यात आली आहे.
अपघात प्रवण रस्त्यावर उपाययोजनांची गरज
या मार्गावर यापूर्वीदेखील अपघाताच्या घटना घडल्या असून, उतार, तीव्र वळणे आणि अरुंद रस्ता यामुळे हा रस्ता वाहनचालकांसाठी धोकादायक ठरत आहे. त्यामुळे अपघात टाळण्यासाठी प्रशासनाने आवश्यक उपाययोजना कराव्यात, अशी मागणी स्थानिक नागरिकांनी केली आहे.
