(खेड)
तालुक्यातील कुडोशी गावाजवळ आज दुपारी सुमारे साडेतीन वाजण्याच्या सुमारास खेडहून देवघरकडे जात असलेल्या ऍक्टिव्हा स्कूटरची आणि समोरून येणाऱ्या मॅक्सिमो मालवाहू टेम्पोची समोरासमोर जोरदार धडक झाली. या भीषण अपघातात ऍक्टिव्हा चालक गंभीर जखमी झाला आहे.
जखमी व्यक्तीची ओळख योगेश मनोहर मोहिते (वय ४५, रा. देवघर बौद्धवाडी) अशी झाली आहे. अपघाताची माहिती मिळताच खेड भरणे नाका ब्रिजजवळील श्री जगद्गुरु नरेंद्राचार्य महाराज संस्थानच्या रुग्णवाहिकेने तातडीने घटनास्थळी धाव घेऊन मोहिते यांना उपजिल्हा रुग्णालय कळंबणी येथे प्राथमिक उपचारासाठी दाखल केले.
प्रत्यक्षदर्शींच्या माहितीनुसार, दोन्ही वाहने भरधाव वेगात होती. अरुंद रस्त्यावरील वळणावर नियंत्रण सुटल्याने ही समोरासमोर धडक झाली. या अपघातात ऍक्टिव्हाचे मोठे नुकसान झाले असून, योगेश मोहिते यांना गंभीर दुखापत झाली आहे.
अपघातामुळे काही काळ वाहतूक ठप्प झाली होती. स्थानिक पोलीस घटनास्थळी दाखल झाले असून, या अपघाताचा तपास सुरू आहे. दरम्यान, येथील अरुंद रस्त्यांवरील वाहतूक सुरळीत ठेवण्यासाठी योग्य ती खबरदारी घ्यावी, अशी मागणी स्थानिक नागरिकांकडून केली जात आहे.
