( राजापूर )
तालुक्यातील ओणी येथील एन. एस. नायक अँड सन्स या बांधकाम कंपनीच्या हॉटमिक्स प्लँटमधून अज्ञात चोरट्याने सुमारे १९ हजार रुपये किमतीच्या सात मोटारी चोरून नेल्याची घटना समोर आली आहे. ही घटना ९ मे २०२५ रोजी पहाटे ३ वाजल्यापासून ते सायंकाळी ७ वाजेपर्यंतच्या कालावधीत घडली. या प्रकरणी १४ मे रोजी राजापूर पोलीस ठाण्यात अधिकृत तक्रार दाखल करण्यात आली आहे.
या प्रकरणी फारुक मुनिर मुजावर (वय २७, रा. राजापूर पेट्रोलपंप पुनर्वसाहत) यांनी पोलिसांत फिर्याद दिली आहे. त्यांनी दिलेल्या माहितीनुसार, हॉटमिक्स प्लँटमध्ये वापरण्यात येणाऱ्या एकूण २५ मोटारींपैकी सात मोटारी अज्ञात चोरट्यांनी त्यांच्या परवानगीशिवाय चोरून नेल्या.
राजापूर पोलिसांनी या प्रकरणी भारतीय न्यायसंहिता अधिनियम २०२३ अंतर्गत कलम ३०३(२) नुसार अज्ञात चोरट्यांविरुद्ध गुन्हा नोंदवला असून, पुढील तपास सुरू आहे.
