(मुंबई)
गेल्या अनेक दिवसांपासून ‘मुख्यमंत्री माझी लाडकी बहीण योजने’चा फेब्रुवारीचा हप्ता महिलांना कधी मिळणार, याकडे संपूर्ण महिला वर्गाचे लक्ष लागून होते. त्यानंतर आता राज्याच्या महिला व बालकल्याण मंत्री आदिती तटकरे यांनी माध्यमांशी बोलतांना महत्त्वाची माहिती दिली आहे.
आदिती तटकरे म्हणाल्या की, ‘मुख्यमंत्री लाडकी बहीण’ योजनेचा फेब्रुवारी महिन्याचा हफ्ता 8 मार्च महिला दिनाच्या पूर्वसंध्येला सर्वांच्या खात्यात जमा होईल. साधारण 5 – 6 मार्च पासून संबंधित प्रक्रिया पूर्ण होईल. फेब्रुवारी आणि मार्च या दोन महिन्याचे एकत्रित पैसे 8 मार्च रोजी लाडक्या बहिणींना मिळणार आहेत. महिला दिनाचं औचित्य साधून आम्ही 8 मार्च रोजी गेल्या महिन्याचा हप्ता वितरित करत आहोत. येत्या ८ मार्चला म्हणजेच महिलादिनी लाडकी बहीण योजनेचा एकत्रित ३००० हजार रुपये मिळणार आहेत”, असे त्यांनी म्हटले.
आदिती तटकरे यांनी योजनेतील महिलांची नावे वगळली जाणार असल्याच्या विरोधकांच्या आरोपावर देखील उत्तर दिले. विरोधक सुरुवातीपासून आरोप करतच आहेत. आम्ही जवळपास अडीच कोटी महिलांपर्यंत पोहोचू शकलेलो आहोत. गेल्या महिन्यामध्ये सुद्धा दोन कोटींपेक्षा अधिक महिला योजनेचा लाभ घेऊ शकल्या आहेत. त्यामुळे ज्या लाभार्थी महिला आहे, त्या त्याचप्रमाणे राहतील. योजना जाहीर झाल्यापासून ही योजना विरोधकांना खुपत आहे आणि गेल्या 5 – 6 महिन्यांपासून ज्या प्रकारे महिलांचा प्रतिसाद मिळत आहे, तो पाहिल्यानंतर विरोधकांमध्ये नैराश्य निर्माण झालं आहे. तेच नैराश्य विरोधक बहिणींमध्ये पसरवताना दिसत आहे. पण महायुतीचं सरकार सक्षम आहे, असेही त्या म्हणाल्या.
