(देवरूख / वार्ताहर)
देवरूख-रत्नागिरी मार्गावरील आंबव परिसरात गेल्या महिन्यात झालेल्या भीषण मोटारसायकल अपघातात गंभीर जखमी झालेल्या तुळसणी येथील केतन संजय मोहिते या तरुणाचे सोमवारी उपचारादरम्यान निधन झाले. अपघातानंतर रुग्णालयात दाखल करण्यात आलेल्या केतन यांची प्रकृती सुधारावी, यासाठी कुटुंबीय, नातेवाईक आणि मित्रपरिवार प्रयत्नशील होते. मात्र, उपचार सुरू असतानाच त्यांची मृत्यूशी सुरू असलेली झुंज अखेर संपली.
गेल्या महिन्यात आंबव परिसरात मोटारसायकलचा भीषण अपघात झाला होता. या दुर्घटनेत केतन मोहिते गंभीर जखमी झाले होते. अपघातानंतर त्यांना तातडीने रुग्णालयात उपचारासाठी दाखल करण्यात आले. तेव्हापासून त्यांच्यावर उपचार सुरू होते. केतन यांच्या प्रकृतीत सुधारणा व्हावी, यासाठी आप्तस्वकीय आणि मित्रमंडळी सातत्याने प्रार्थना करत होते. मात्र, उपचारांना यश आले नाही आणि सोमवारी त्यांची प्राणज्योत मालवली.
हसतमुख आणि मनमिळाऊ स्वभावामुळे परिचित असलेल्या केतन यांच्या अकाली निधनाने मोहिते कुटुंबावर दुःखाचा डोंगर कोसळला आहे. त्यांच्या निधनाचे वृत्त समजताच तुळसणी गावासह संपूर्ण पंचक्रोशीत हळहळ व्यक्त होत आहे.
