(चिपळूण / रत्नागिरी)
रस्त्यावरील परिस्थितीकडे दुर्लक्ष करून भरधाव वेगाने आणि निष्काळजीपणे दुचाकी चालविल्याने दोन मोटारसायकलींची समोरासमोर जोरदार धडक झाली. या भीषण अपघातात ५६ वर्षीय अशोक कृष्णा राणे यांना गंभीर दुखापत होऊन त्यांचा मृत्यू झाला, तर दुसरे दुचाकीस्वार संजय श्रीकांत पवार (वय ४०) जखमी झाले. ही घटना ७ नोव्हेंबर २०२६ रोजी सकाळी ९.४५ वाजण्याच्या सुमारास चिपळूण तालुक्यातील पिंपळी बुद्रुक येथे घडली.
याप्रकरणी मयत अशोक राणे यांचे पुत्र संकेत अशोक राणे (वय २७, रा. कोळकेवाडी जोशीवाडी, ता. चिपळूण) यांनी अलोरे-शिरगाव पोलीस ठाण्यात तक्रार दाखल केली आहे. मिळालेल्या माहितीनुसार संजय श्रीकांत पवार हे एचएफ डिलक्स मोटारसायकल (क्रमांक एमएच ०८ एव्ही ९६०३) घेऊन जात असताना त्यांनी रस्त्याची परिस्थिती आणि वाहतुकीचे नियम यांकडे दुर्लक्ष केले. भरधाव वेगाने व हयगयीने दुचाकी चालवून त्यांनी समोरून येणाऱ्या अशोक कृष्णा राणे यांच्या एचएफ डिलक्स मोटारसायकलला (क्रमांक एमएच ०८ एझेड ०९९६) जोरदार धडक दिल्याचा आरोप आहे. या धडकेत अशोक राणे गंभीर जखमी झाले. या दुखापतींमुळे त्यांचा मृत्यू झाला, तर संजय पवार यांनाही दुखापत झाली. या अपघातात दोन्ही मोटारसायकलींचे नुकसान झाल्याचे तक्रारीत नमूद आहे.
या प्रकरणी संजय श्रीकांत पवार यांच्याविरोधात भारतीय न्याय संहिता २०२३ मधील कलम १०६, १२५, १२५(ब) तसेच मोटार वाहन कायदा कलम १८४ अन्वये अलोरे-शिरगाव पोलीस ठाण्यात गुन्हा दाखल करण्यात आला आहे. भरधाव वेग, वाहतुकीच्या नियमांकडे होणारे दुर्लक्ष आणि वाहन चालविताना आवश्यक खबरदारीचा अभाव यामुळे रस्ते अपघातांचे गंभीर परिणाम समोर येत आहेत. एका कुटुंबातील कर्त्या व्यक्तीचा अपघाती मृत्यू झाल्याने कोळकेवाडी जोशीवाडी परिसरात हळहळ व्यक्त होत आहे.
