(मुंबई / वृत्तसंस्था)
बालपणीच आई-वडिलांचे छत्र हरवलेल्या दोन भावांच्या भवितव्याचा प्रश्न अखेर न्यायालयीन निर्णयामुळे मार्गी लागला आहे. २०१८ मध्ये मुंबई-पुणे एक्सप्रेसवेवर झालेल्या भीषण अपघातात आई-वडिलांचा मृत्यू झाल्यानंतर नुकसानभरपाईसाठी सुरू असलेल्या लढ्याला यश आले आहे. मोटार अपघात दावा न्यायाधिकरणाने दोन्ही मुलांना आणि त्यांच्या आजीला एकूण ३ कोटी ४ लाख रुपयांची भरपाई मंजूर केली आहे. मात्र, अपघाताच्या वेळी कार चालवणारे वडील अंकित चुघ यांचीच ७० टक्के चूक असल्याचे न्यायाधिकरणाने ठरवले. त्यामुळे भरपाईच्या मूळ रकमेत मोठी कपात झाली. ही चूक नसती, तर संबंधित कुटुंबाला सुमारे ६.५ कोटी रुपयांची नुकसानभरपाई मिळण्याची शक्यता होती.
या अपघातात मृत्यू झालेल्या अंकित चुघ आणि त्यांच्या पत्नी सुंजना या दोघांचेही वय ३४ वर्षे होते. २३ डिसेंबर २०१८ रोजी पहाटे साडेपाचच्या सुमारास ते आपल्या दोन मुलांसह वॅगनआर कारमधून मुंबई-पुणे एक्सप्रेसवेवरून प्रवास करत होते. त्यावेळी राजस्थानमधील बांसवाडा येथील पुण्या ट्रान्सपोर्टेशन कंपनीचा ट्रक पुढे जात होता. भारत कुमार हा ट्रक चालवत होता. ट्रकचालकाने अचानक ब्रेक लावल्यामुळे मागून येणारी अंकित यांची कार ट्रकवर आदळल्याचा आरोप करण्यात आला होता. धडकेनंतर ट्रकने कारला जवळपास एक किलोमीटरपर्यंत फरफटत नेले. या अपघातात अंकित आणि सुंजना गंभीर जखमी झाले. त्यांना तातडीने पनवेल ग्रामीण रुग्णालयात दाखल करण्यात आले; मात्र डॉक्टरांनी दोघांनाही मृत घोषित केले. त्यांची दोन्ही मुलेही अपघातात जखमी झाली होती.
अपघाताच्या कारणांचा विचार करताना न्यायाधिकरणाने कारचालक अंकित यांच्या वाहन चालवण्यातील त्रुटींकडे लक्ष वेधले. पुढील वाहनापासून पुरेसे अंतर न राखणे आणि वाहनाचा वेग वेळेत नियंत्रित न करणे यामुळे अपघात टाळता आला नाही, असे निरीक्षण नोंदवण्यात आले. त्यामुळे या दुर्घटनेची जबाबदारी ट्रकचालकावर ३० टक्के, तर कारचालक अंकित यांच्यावर ७० टक्के निश्चित करण्यात आली.
अंकित यांच्या मृत्यूबद्दल दाखल करण्यात आलेल्या दाव्यात सुरुवातीला २ कोटी ९४ लाख रुपयांची नुकसानभरपाई निश्चित झाली होती. मात्र, अपघातातील त्यांच्या ७० टक्के चुकीचा विचार करून ही रक्कम कमी करण्यात आली. अखेरीस त्यांच्या मृत्यूच्या दाव्यापोटी ८८ लाख ४५ हजार रुपये मंजूर करण्यात आले. दुसरीकडे, सुंजना या कारमध्ये प्रवासी म्हणून होत्या. अपघातात त्यांची कोणतीही चूक नसल्याने त्यांच्या मृत्यूच्या दाव्यात न्यायाधिकरणाने संपूर्ण नुकसानभरपाई मंजूर केली. त्यानुसार त्यांच्या दाव्याची रक्कम ९२ लाख ५३ हजार रुपये निश्चित करण्यात आली.
दोन्ही दाव्यांतील नुकसानभरपाईची मूळ रक्कम एकत्रितपणे सुमारे १ कोटी ८० लाख रुपये झाली. याशिवाय ९ एप्रिल २०१९ पासून २९ ऑक्टोबर २०२६ रोजी निकाल जाहीर होईपर्यंत वार्षिक ९ टक्के दराने व्याज देण्याचे आदेश देण्यात आले. या व्याजाची रक्कम सुमारे १ कोटी २३ लाख रुपये झाली. त्यामुळे मूळ भरपाई आणि व्याज मिळून एकूण ३ कोटी ४ लाख रुपये दावेदारांना मिळणार आहेत.
ही रक्कम मृत दाम्पत्याची मुले सिदाक आणि समर्थ तसेच त्यांची ६४ वर्षीय आजी पूजा चुघ यांच्यात वाटली जाणार आहे. अपघात झाला तेव्हा सिदाक अवघ्या चार वर्षांचा, तर समर्थ सात वर्षांचा होता. आई-वडिलांचे छत्र हरपलेल्या या दोन्ही मुलांच्या भविष्यासाठी ही भरपाई महत्त्वाची ठरणार आहे. दरम्यान, मृत दाम्पत्याची ४३ वर्षीय विवाहित बहीण सनेहा रिया चुघ यांनीही नुकसानभरपाईसाठी दावा दाखल केला होता. मात्र, त्या विवाहित असून मृत दाम्पत्यावर आर्थिकदृष्ट्या अवलंबून नव्हत्या. या कारणास्तव न्यायाधिकरणाने त्यांचा दावा फेटाळून लावला.
या अपघातानंतर नवीन पनवेल पोलिसांनी ट्रकचालकाविरोधात गुन्हा दाखल केला होता. ट्रकचा विमा उतरवलेल्या नॅशनल इन्शुरन्स कंपनीने मात्र संपूर्ण अपघाताची जबाबदारी कारचालक अंकित यांच्यावर टाकत नुकसानभरपाई देण्याची जबाबदारी नाकारण्याचा प्रयत्न केला. मात्र, न्यायाधिकरणाने विमा कंपनीची ही भूमिका स्वीकारली नाही. तृतीय पक्षाला नुकसानभरपाई देण्याची जबाबदारी विमा कंपनीला पूर्णपणे टाळता येणार नसल्याचे स्पष्ट करत न्यायाधिकरणाने प्रथम दावेदारांना संपूर्ण मंजूर रक्कम अदा करण्याचे आदेश दिले.
तसेच ट्रकच्या परमिटमधील अटींचे उल्लंघन झाल्याच्या कारणावरून विमा कंपनीला भरपाईची रक्कम नंतर ट्रकमालकाकडून वसूल करण्याची मुभाही देण्यात आली आहे. त्यामुळे अपघातातील दोन्ही पालक गमावलेल्या मुलांना आणि त्यांच्या आजीला नुकसानभरपाई मिळण्याचा मार्ग मोकळा झाला आहे.
