(राजापूर / तुषार पाचलकर)
राजापूर तालुक्यातील पाचल बीटने शैक्षणिक गुणवत्तेच्या क्षेत्रात आघाडी घेतली असून, पाचल बौद्धवाडी आणि रायपाटण नं. १ या शाळांची कामगिरी कौतुकास्पद असल्याचे प्रतिपादन राजापूर पंचायत समितीचे गटशिक्षणाधिकारी उत्तम भोसले यांनी केले. पाचल येथे आयोजित प्रभागस्तरीय शिक्षण परिषदेत ते बोलत होते.
राजापूर तालुका शिष्यवृत्ती अभियानाच्या माध्यमातून विद्यार्थ्यांची शैक्षणिक गुणवत्ता वाढविण्यासाठी विशेष प्रयत्न सुरू आहेत. तालुक्यातील प्रत्येक विद्यार्थ्याची गुणवत्ता उंचावण्याची जबाबदारी शिक्षकांची असून, त्यासाठी नियोजनबद्ध आणि जाणीवपूर्वक प्रयत्न करणे आवश्यक असल्याचे भोसले यांनी स्पष्ट केले.
विद्यार्थ्यांना गुणवत्तापूर्ण शिक्षण देण्यासाठी शिक्षकांनी सातत्याने प्रयत्नशील राहावे, असे आवाहन त्यांनी केले. शिष्यवृत्ती परीक्षेत यश मिळविण्यासाठी नियमित सराव, योग्य मार्गदर्शन आणि प्रत्येक विद्यार्थ्याकडे वैयक्तिक लक्ष देणे महत्त्वाचे आहे. त्याचबरोबर शिक्षकांनी आपल्या अध्यापन कौशल्यात सातत्याने सुधारणा करून विद्यार्थ्यांच्या शैक्षणिक प्रगतीसाठी प्रयत्न करावेत, असेही त्यांनी सांगितले.
नव्याने नियुक्त झालेल्या शिक्षण सेवकांना मार्गदर्शन करताना भोसले यांनी प्रामाणिकपणा आणि सातत्यपूर्ण प्रयत्नांतून शैक्षणिक गुणवत्ता सिद्ध करण्याचे महत्त्व अधोरेखित केले. पाचल बीटमधील शाळांनी मिळविलेली आघाडी कायम राखत विद्यार्थ्यांच्या प्रगतीसाठी अधिक प्रभावीपणे काम करावे, अशी अपेक्षाही त्यांनी व्यक्त केली.
या परिषदेत ‘मूल्यवर्धन उजळणी’ या विषयावर धुळे सर यांनी मार्गदर्शन केले. विद्यार्थ्यांची अध्ययन प्रक्रिया अधिक परिणामकारक करण्यासाठी उजळणीचे महत्त्व आणि त्याचे नियोजन याविषयी त्यांनी माहिती दिली. तसेच ‘स्पर्श’ या विषयावर श्री. बिर्जे यांनी मार्गदर्शन करून संबंधित शैक्षणिक बाबींचे महत्त्व स्पष्ट केले.
परितकर मॅडम यांनी आदर्श पाठाचे प्रभावी सादरीकरण केले. पाठाचे नियोजन, विषयाची मांडणी आणि विद्यार्थ्यांना विषय समजावून सांगण्याची पद्धत यांमुळे त्यांच्या सादरीकरणाचे उपस्थितांनी कौतुक केले. या सादरीकरणातून शिक्षकांना प्रभावी अध्यापन पद्धतींचा अनुभव घेण्याची संधी मिळाली.
प्रभागस्तरीय शिक्षण परिषदेत शैक्षणिक गुणवत्ता वृद्धी, शिष्यवृत्ती अभियानाची प्रभावी अंमलबजावणी, मूल्यवर्धन उजळणी आणि नावीन्यपूर्ण अध्यापन पद्धती या विषयांवर मार्गदर्शन करण्यात आले. विद्यार्थ्यांची गुणवत्ता वाढविण्यासाठी शिक्षकांनी एकत्रितपणे प्रयत्न करावेत आणि शाळांच्या प्रगतीसाठी नावीन्यपूर्ण उपक्रम राबवावेत, हा संदेश या परिषदेतून देण्यात आला.
पाचल बीटमधील शाळांनी शैक्षणिक गुणवत्तेच्या क्षेत्रात मिळविलेली आघाडी शिक्षकांच्या सातत्यपूर्ण प्रयत्नांचे आणि शैक्षणिक उपक्रमांचे फलित असल्याचे परिषदेत अधोरेखित झाले. विद्यार्थ्यांच्या शैक्षणिक प्रगतीसाठी शिक्षकांना प्रेरणा देणारी ही परिषद उत्साहपूर्ण वातावरणात संपन्न झाली.
