आसाममधील २० वर्षीय महाविद्यालयीन विद्यार्थिनी हिमाश्री बोरो हिचा आंध्र प्रदेशातील रेल्वे रुळांजवळ मृतदेह आढळल्याने खळबळ उडाली आहे. नृत्य स्पर्धेत सहभागी होण्यासाठी विशाखापट्टणमला गेलेली हिमाश्री परतीच्या प्रवासात एकटी होती. प्रवासादरम्यान रेल्वेच्या डब्यात दारूच्या नशेत असलेले पुरुष असल्याने असुरक्षित वाटत असल्याचे तिने कुटुंबीयांना फोनवर सांगितले होते. त्यानंतर तिच्याशी संपर्क तुटला आणि दुसऱ्या दिवशी तिचा मृतदेह आढळला. या मृत्यूबाबत कुटुंबीयांनी संशय व्यक्त केला असून, प्रकरणाचा तपास करण्यासाठी आंध्र प्रदेश पोलिसांनी विशेष तपास पथकाची (SIT) स्थापना केली आहे.
हिमाश्री बोरो ही आसाममधील कामरूप महानगर जिल्ह्यातील बोंडा परिसरात राहत होती. नृत्य स्पर्धेसाठी ती एका पथकासोबत विशाखापट्टणमला गेली होती. गुवाहाटी येथे परीक्षा असल्यामुळे ती पथकातील इतर सदस्यांआधीच एकटी परतीच्या प्रवासाला निघाली. ६ ऑक्टोबरच्या पहाटे ट्रेनमध्ये चढल्यानंतर तिने आईला, आपल्या भावजयला आणि एका मैत्रिणीला फोन केला. डब्यात अनेक पुरुष दारूच्या नशेत असल्यामुळे अस्वस्थ आणि असुरक्षित वाटत असल्याचे तिने सांगितले. डब्यातील परिस्थितीचा व्हिडीओही तिने मैत्रिणीला पाठवला होता. मात्र, पहाटे साधारण अडीच ते तीनच्या दरम्यान तिच्याशी संपर्क तुटला.
हिमाश्रीशी संपर्क होत नसल्याने कुटुंबीयांनी रेल्वे हेल्पलाइनवर माहिती दिली. रेल्वेच्या माहितीनुसार, ६ ऑक्टोबर रोजी ‘रेल मदद’ पोर्टलवर ट्रेनमधील महिला प्रवाशासोबत कथित गैरवर्तन झाल्याची तक्रार प्राप्त झाली होती. त्यानंतर श्रीकाकुलम रोड स्थानकावर रेल्वे सुरक्षा दलाच्या (RPF) अधिकाऱ्यांनी सामान्य आणि शयनयान डब्यांची तपासणी केली. मात्र, या तपासणीत हिमाश्रीचा शोध लागला नाही. कुटुंबीयांच्या म्हणण्यानुसार, त्यानंतरही ती सुरक्षित असल्याची खात्री त्यांना मिळाली नाही. दरम्यान, तिच्या दोन बॅगा ट्रेनमधील S-2 डब्यात व्यवस्थित आढळल्या.
७ ऑक्टोबर रोजी आंध्र प्रदेशातील श्रीकाकुलम जिल्ह्यात पोंडुरू आणि दुसी रेल्वे विभागांदरम्यान रेल्वे रुळांजवळ हिमाश्रीचा मृतदेह आढळला. त्यानंतर मृतदेह शवविच्छेदनासाठी शासकीय रुग्णालयात पाठवण्यात आला. रेल्वेच्या प्राथमिक तपासात ती धावत्या ट्रेनमधून पडली असावी, अशी शक्यता व्यक्त करण्यात आली होती. मात्र, तिचा मृत्यू नेमका कशामुळे झाला, हे अद्याप स्पष्ट झालेले नाही. कुटुंबीयांनी या प्रकरणात संशय व्यक्त करत सखोल चौकशी करण्याची मागणी केली आहे.
या घटनेची दखल घेत आसामचे मुख्यमंत्री हिमंत बिस्व सरमा यांनी आंध्र प्रदेशचे मुख्यमंत्री एन. चंद्राबाबू नायडू आणि केंद्रीय रेल्वेमंत्री अश्विनी वैष्णव यांना पत्र लिहिले. हिमाश्रीच्या मृत्यूची निष्पक्ष आणि सखोल चौकशी करून ती कालमर्यादेत पूर्ण करावी, अशी मागणी त्यांनी केली. त्यानंतर तपासासाठी विशेष तपास पथक स्थापन करण्यात आले. आसाम आणि आंध्र प्रदेशातील पोलीस, रेल्वे सुरक्षा दल तसेच सरकारी रेल्वे पोलीस परस्पर समन्वयाने तपास करत आहेत. प्रवाशांचे जबाब नोंदवण्याबरोबरच रेल्वे स्थानकांवरील सीसीटीव्ही चित्रण आणि अन्य पुराव्यांची तपासणी केली जात आहे.
तपास यंत्रणा हिमाश्रीच्या प्रवासातील घटनाक्रम स्पष्ट करण्यासाठी विविध बाजूंनी तपास करत आहेत. तिच्यासोबत S-2 डब्यातून प्रवास करणाऱ्या प्रवाशांचे जबाब नोंदवले जात असून, तिकीट तपासनीस आणि रेल्वे कर्मचाऱ्यांचीही चौकशी सुरू आहे. पोलिसांनी हिमाश्रीचा मोबाईल फोन ताब्यात घेतला असून, त्यातील छायाचित्रे, व्हिडीओ, संदेश, दूरध्वनी नोंदी आणि अन्य माहितीची डिजिटल तपासणी केली जाणार आहे. या प्रकरणातील विविध बाबींचा तपास करण्यासाठी आठ विशेष पथके कार्यरत आहेत. हिमाश्रीच्या मृत्यूमागील नेमके कारण आणि प्रवासादरम्यान घडलेल्या घटनांचा उलगडा तपासातून होणार आहे.
