(रत्नागिरी / प्रतिनिधी)
क्रिकेटच्या मैदानावर आपले कौशल्य दाखवण्यासाठी कल्याणहून रत्नागिरीत आलेल्या दोन १६ वर्षीय खेळाडूंचा कोळंबे येथील पाणवठ्यात बुडून दुर्दैवी मृत्यू झाला. शुभम यादव आणि सौरभ झा अशी मृत्यू झालेल्या दोन्ही अल्पवयीन खेळाडूंची नावे आहेत. सोसा मैदानावर क्रिकेट सामने खेळण्यासाठी आलेल्या या दोघांचा अचानक मृत्यू झाल्याने क्रीडा वर्तुळासह त्यांच्या कुटुंबीयांवर दुःखाचा डोंगर कोसळला आहे.
ठाणे जिल्ह्यातील कल्याण येथील ‘कल्याण क्रिकेट अकॅडमी’चा संघ क्रिकेट सामन्यांसाठी रत्नागिरीतील कोळंबे येथील सोसा मैदानावर आला होता. आज (गुरुवारी) दुपारी सामन्यांचे सत्र सुरू असताना किंवा त्यानंतर खेळाडू मैदानाच्या परिसरात होते. याचदरम्यान शुभम यादव आणि सौरभ झा हे मैदानाजवळील पाणवठ्याच्या ठिकाणी गेले होते. उष्णतेमुळे तसेच खेळाचा थकवा घालवण्यासाठी काही खेळाडू पाणवठ्याच्या परिसरात गेले असताना शुभम आणि सौरभ पाण्यात बुडाल्याचे समोर आले. दोघेही पाण्यात बुडाल्याचे लक्षात येताच सोबतच्या खेळाडूंनी आरडाओरड करत मदतीसाठी हाक दिली.
घटनेची माहिती मिळताच स्थानिक नागरिकांनी तातडीने घटनास्थळी धाव घेतली. स्थानिकांच्या मदतीने पाण्यात शोधमोहीम राबवून दोन्ही मुलांना बाहेर काढण्यात आले. त्यानंतर त्यांना तातडीने रुग्णालयात नेण्यात आले. मात्र, वैद्यकीय तपासणीनंतर डॉक्टरांनी दोघांनाही मृत घोषित केले.
अवघ्या १६व्या वर्षी क्रिकेटमध्ये नाव कमावण्याचे स्वप्न उराशी बाळगून मैदानावर उतरलेल्या दोन होतकरू खेळाडूंचा अशा प्रकारे अकाली अंत झाल्याने कल्याण क्रिकेट अकॅडमीमध्ये शोककळा पसरली आहे. कुटुंबीय, प्रशिक्षक, सहकारी खेळाडू आणि मित्रपरिवारावर या घटनेने मोठा आघात झाला आहे. दरम्यान, घटनेची माहिती मिळाल्यानंतर पोलिसांनी घटनास्थळी धाव घेतली असून, या दुर्घटनेची नोंद करून पुढील तपास सुरू केला आहे. दोन्ही मुलांच्या मृत्यूमागील नेमका घटनाक्रम तसेच अन्य बाबींची अधिकृत माहिती तपासानंतर स्पष्ट होणार आहे.
