(रायगड / वृत्तसंस्था)
रायगड जिल्ह्यातील प्रसिद्ध पर्यटनस्थळ असलेल्या दिवेआगर समुद्रकिनारी फिरण्यासाठी आलेल्या पुण्यातील आळंदी येथील एका खासगी कोचिंग क्लासच्या सहलीतील आठ जणांचा समुद्रात बुडून मृत्यू झाला. समुद्रातील पाण्याचा अंदाज न आल्याने ही दुर्घटना घडल्याची प्राथमिक माहिती मिळाली आहे. या घटनेमुळे परिसरात खळबळ उडाली आहे.
मिळालेल्या माहितीनुसार, पुण्यातील आळंदी येथील एका खासगी कोचिंग क्लासची सहल दिवेआगर येथे आली होती. समुद्रकिनारी मुले पाण्यात गेली असताना त्यांना खोलीचा अंदच न आल्याने त्यातील आठ जण खोल पाण्यात ओढले गेले आणि बुडू लागले. 42 विद्यार्थी आणि 6 शिक्षक असे 48 जण सहलीसाठी आले होते. हे विद्यार्थी आळंदीतील विनर अकॅडमीतील असल्याची माहिती समोर येत आहे.
मिळालेल्या माहितीनुसार, आळंदी येथून खासगी कोचिंग क्लासची सहल दिवेआगर येथे आली होती. समुद्रकिनारी फिरत असताना अचानक आठ जण खोल पाण्यात ओढले गेले आणि बुडू लागले. यावेळी दिवेआगर येथील भाऊ मारुती साळुंखे महाकाली वॉटर स्पोर्ट्सचे मालक आणि त्यांच्या सहकाऱ्यांनी क्षणाचाही विलंब न करता समुद्रात शोधमोहीम राबवली. भाऊ साळुंखे व त्यांच्या सहकाऱ्यांनी अथक प्रयत्नांनंतर आठही विद्यार्थ्यांना पाण्यातून बाहेर काढले. त्यानंतर सर्वांना तातडीने बोर्ली येथील प्राथमिक आरोग्य केंद्रात उपचारासाठी दाखल करण्यात आले. मात्र, उपचार सुरू असतानाच त्यांचा मृत्यू झाल्याचे रुग्णालय प्रशासनाने सांगितले.
मृतांची नावे
यश किरण वानखेडे, सोहम तुकाराम भांडवलकर, तन्मय दत्तात्रय वाहिले, कौस्तुभ संदीप दौंड, कैवल्य वासनकर, राजवील वहिले, प्रणव बनसोडे, सुमीत अहिरे अशी या दुर्घटनेत मृत्यूमुखी पडलेल्या विद्यार्थ्यांची नावे आहेत.
घटनेची माहिती मिळाल्यानंतर स्थानिक प्रशासन आणि पोलीस प्रशासनाने पुढील तपास सुरू केला आहे. समुद्रात उतरताना पर्यटकांनी आवश्यक खबरदारी घ्यावी, असे आवाहन प्रशासनाकडून करण्यात येत आहे.
इतर सर्व विद्यार्थी सध्या हॉटेलमध्ये सुरक्षित असून शिक्षक व संस्थेच्या देखरेखीखाली आहेत. पालकांनी कृपया घाबरून जाऊ नये. चुकीची माहिती अथवा अफवांवर विश्वास ठेवू नये. परिस्थितीबाबत अधिकृत माहिती उपलब्ध होताच पालकांना कळविण्यात येईल, असे आवाहन विनर्स अॅकडमीनं केलं आहे. विनर्स अकॅडमीच्या 11th अँड 12th ची 25 मुले, 17 मुली आणि 6 शिक्षक असे एकूण 48 विद्यार्थी आणि शिक्षक दिघी सागरी पोलीस ठाणे हद्दीतील मौजे दिवेआगर येथील समुद्रकिनाऱ्यावर पर्यटनासाठी गेले होते. त्यातील 8 विद्यार्थी समुद्रकिनाऱ्यावर पोहत असताना त्यांना पाण्याचा अंदाज न आल्यानं बुडाले. सर्व मृत विद्यार्थ्यांचं वय 17 ते 18 वर्षे होते.


