(नवी दिल्ली / वृत्तसंस्था)
भारतातील ऑटोमोबाइल क्षेत्रात JSW ग्रुपकडून विस्ताराची तयारी सुरू असताना JSW ग्रीनटेकने ‘AMPSTAR’ या नव्या ब्रँडचे भारतीय बाजारपेठेत लाँचिंग केले आहे. या ब्रँडअंतर्गत इलेक्ट्रिक कमर्शियल मोबिलिटीशी संबंधित विविध सेवा देण्यात येणार असून, त्यामध्ये वाहन विक्रीसोबत फायनान्सिंग, पायाभूत सुविधा आणि विक्रीनंतरच्या सेवांचाही समावेश असेल.
‘AMPSTAR’ हा ब्रँड कमर्शियल मोबिलिटी सर्व्हिस म्हणून सादर करण्यात आला आहे. या माध्यमातून ग्राहकांना नवीन व्यावसायिक वाहनांची उपलब्धता करून देण्याबरोबरच वाहनांच्या वित्तपुरवठ्यापासून आफ्टर-सेल्स सर्व्हिसपर्यंत विविध सुविधा देण्याची योजना आहे. या ब्रँडअंतर्गत १५० ते ५०० किलोवॅटपर्यंत क्षमतेच्या व्यावसायिक इलेक्ट्रिक बस आणि ट्रकची ऑफर केली जाणार आहे. या वाहनांमध्ये प्रगत तंत्रज्ञानासोबत विविध आधुनिक फीचर्स उपलब्ध करून देण्यात येणार आहेत.
महाराष्ट्रात उत्पादन प्रकल्प
‘AMPSTAR’ अंतर्गत सादर होणारे व्यावसायिक ट्रक आणि बस भारतातच तयार केले जाणार आहेत. यासाठी JSW ने महाराष्ट्रातील संभाजी नगर येथे ९० एकर क्षेत्रावर उत्पादन प्रकल्प सुरू केला आहे. या प्रकल्पाची दरवर्षी १५ हजार इलेक्ट्रिक बस आणि ट्रक तयार करण्याची क्षमता आहे.
सज्जन जिंदल यांनी मांडली कंपनीची भूमिका
लाँचिंगच्या वेळी JSW ग्रुपचे चेअरमन सज्जन जिंदल यांनी इलेक्ट्रिक कमर्शियल मोबिलिटी क्षेत्रात उतरण्यामागील कंपनीची भूमिका स्पष्ट केली. त्यांनी सांगितले की, इलेक्ट्रिक कमर्शियल मोबिलिटी क्षेत्रात प्रवेश करण्याचा निर्णय हा केवळ व्यावसायिक उपक्रम म्हणून नव्हे, तर देश उभारणीच्या कामाचा एक भाग म्हणून पाहिला. भारतातील नागरिक आणि मालाची वाहतूक बाहेरून आयात होणाऱ्या इंधनाऐवजी भारतात निर्माण होणाऱ्या विजेच्या माध्यमातून व्हावी, हा त्यामागील उद्देश असल्याचे त्यांनी सांगितले.
जगभरातील तेलाच्या किमती नियंत्रित करणे शक्य नसले तरी त्यावरील भारताचे अवलंबित्व किती असावे, हे निश्चित करता येते, असे जिंदल यांनी नमूद केले. ‘AMPSTAR’च्या माध्यमातून भारताच्या वाहतुकीच्या पद्धतीत मोठी भूमिका बजावण्याचे कंपनीचे उद्दिष्ट असल्याचेही त्यांनी स्पष्ट केले.
इलेक्ट्रिक बस आणि ट्रक स्वीकारण्याचा निर्णय ग्राहक तेव्हाच घेतील, जेव्हा त्यांना त्याचा स्पष्ट आर्थिक फायदा दिसेल, केवळ भावनिक कारणांवरून नव्हे, असेही जिंदल यांनी सांगितले. इलेक्ट्रिक व्यावसायिक वाहनांचा वापर वाढल्यास त्याचा परिणाम केवळ वाहनांपुरता मर्यादित न राहता ऊर्जा सुरक्षा, लॉजिस्टिक्सचा खर्च, भारतीय उद्योगाची जागतिक स्पर्धात्मकता आणि देशातील मजबूत उत्पादन परिसंस्था यावर होऊ शकतो. तसेच भविष्यातील पिढ्यांसाठी अधिक स्वच्छ वातावरण निर्माण करण्यासही त्याचा फायदा होईल, असे त्यांनी स्पष्ट केले.
