(कोल्हापूर / वृत्तसंस्था)
कोल्हापूर जिल्हा सहकारी दूध उत्पादक संघ अर्थात गोकुळच्या अध्यक्षपदाच्या निवडणुकीत महायुतीने अखेर बाजी मारली आहे. राष्ट्रवादी काँग्रेसचे माजी आमदार आणि महायुतीचे उमेदवार राजेश पाटील यांनी समविचारी आघाडीचे उमेदवार शशिकांत पाटील-चुयेकर यांचा १६ विरुद्ध १३ मतांनी पराभव करत अध्यक्षपद मिळवले. निवडून आलेल्या संचालकांमध्ये १३ सदस्यांचे संख्याबळ असतानाही समविचारी आघाडीला अध्यक्षपद मिळवण्यात अपयश आले. त्यामुळे आमदार सतेज पाटील यांच्यासाठी हा राजकीय धक्का मानला जात आहे.
गोकुळच्या अध्यक्षपदाची निवडणूक कोरमअभावी तहकूब झाल्यानंतर गेल्या पंधरा दिवसांपासून निर्माण झालेला पेच अखेर आज (१० नोव्हेंबर) रोजी दूर झाला. निवडणूक निर्णय अधिकारी मोसमी चौगुले यांच्या अध्यक्षतेखाली झालेल्या सभेत अध्यक्षपदासाठी मतदान घेण्यात आले. सतेज पाटील यांच्या नेतृत्वाखालील राजर्षी शाहू शेतकरी समविचारी आघाडीकडून शशिकांत पाटील-चुयेकर, तर महायुतीप्रणित छत्रपती शाहू शेतकरी विकास आघाडीकडून राष्ट्रवादी काँग्रेसचे माजी आमदार राजेश पाटील निवडणुकीच्या रिंगणात होते. या चुरशीच्या लढतीत राजेश पाटील यांनी बाजी मारली.
मतदान प्रक्रियेत गोकुळचे निवडून आलेले २५ संचालक आणि शासननियुक्त चार संचालक सहभागी झाले. एकूण २९ मतांपैकी राजेश पाटील यांना १६, तर शशिकांत पाटील-चुयेकर यांना १३ मते मिळाली. शासननियुक्त चारही संचालकांनी महायुतीच्या उमेदवाराच्या बाजूने मतदान केल्याने महायुतीचा विजय निश्चित झाला.
गोकुळ दूध संघासाठी १८ ऑक्टोबर रोजी मतदान झाले होते. त्यानंतर १९ ऑक्टोबरला निकाल जाहीर करण्यात आला. एकूण २५ जागांपैकी सतेज पाटील यांच्या राजर्षी शाहू शेतकरी समविचारी आघाडीने १३ जागा जिंकल्या होत्या, तर महायुतीप्रणित छत्रपती शाहू शेतकरी विकास आघाडीला १२ जागा मिळाल्या होत्या. संचालक मंडळात समविचारी आघाडीचे १३ आणि महायुतीचे १२ सदस्य निवडून आले होते. मात्र, अध्यक्षपदाच्या निवडीसाठी आवश्यक असलेला कोरम पूर्ण होत नसल्याने निवडणुकीची प्रक्रिया रखडली होती.
हा पेच सोडवण्यासाठी महायुतीने गोकुळच्या संचालक मंडळावर पाच शासननियुक्त संचालक नेमण्याचा निर्णय घेतला. त्यापैकी चार संचालकांना मतदानाचा अधिकार देण्यात आला. शासननियुक्त संचालकांच्या नियुक्तीच्या निर्णयाला सतेज पाटील यांनी न्यायालयात आव्हान दिले होते. मात्र, औरंगाबाद खंडपीठाने १० नोव्हेंबर रोजी नियोजित कार्यक्रमानुसार गोकुळच्या अध्यक्षपदाची निवडणूक घेण्याचे आदेश दिले. ही संपूर्ण निवडणूक प्रक्रिया अंतिम निकालाच्या अधीन ठेवून पार पाडण्याचेही न्यायालयाने स्पष्ट केले होते. त्यानुसार अध्यक्षपदासाठी मतदान घेण्यात आले आणि राजेश पाटील यांची निवड निश्चित झाली.
राजेश नरसिंगराव पाटील हे राष्ट्रवादी काँग्रेसचे माजी आमदार असून त्यांनी कोल्हापूर जिल्ह्यातील चंदगड विधानसभा मतदारसंघाचे प्रतिनिधित्व केले आहे. हसन मुश्रीफ आणि स्वर्गीय अजित पवार यांचे विश्वासू म्हणून त्यांची ओळख आहे. २०२४ च्या विधानसभा निवडणुकीत भाजपचे बंडखोर उमेदवार शिवाजी पाटील यांनी त्यांचा पराभव केला होता. राजेश पाटील यांचे वडील नरसिंग गुरुनाथ पाटील यांनीही यापूर्वी आमदार म्हणून काम पाहिले होते.
दरम्यान, राजेश पाटील यांच्या गोकुळ अध्यक्षपदाच्या निवडीच्या पार्श्वभूमीवर अजित पवार यांच्या पूर्वीच्या भाषणाची चर्चा सुरू झाली आहे. चंदगड, आजरा आणि गडहिंग्लज येथील नागरिकांनी आपला अत्यंत प्रेमाने नागरी सत्कार केला होता. त्या सत्कारानंतर आपण पुन्हा राज्याचे उपमुख्यमंत्री झालो आणि त्यानंतर झालेल्या सत्कारानंतर राष्ट्रवादी काँग्रेस पक्ष पुन्हा सत्तेत आला, तसेच आपण पुन्हा उपमुख्यमंत्री झालो, असे अजित पवार यांनी म्हटले होते.
त्या वेळी राजेश पाटील यांच्या विधानसभा निवडणुकीतील पराभवाचा उल्लेख करताना अजित पवार यांनी आपण सत्कारावेळी फेटा बांधला नसल्याचे सांगितले होते. आपला उजवा हात असलेले राजेश पाटील पराभूत झाल्यामुळे फेटा बांधण्याची इच्छा झाली नाही, असे त्यांनी स्पष्ट केले होते. राजेश पाटील पुन्हा निवडून आल्यास आपण कितीही फेटे बांधण्यास तयार असल्याचे सांगत त्यांनी चंदगडकरांना त्यांना निवडून आणण्याचे आवाहन केले होते. चंदगडकरांचा सत्कार आपल्याला नेहमीच पावतो, असेही त्यांनी नमूद केले होते.
स्वर्गीय नरसिंगराव पाटील यांचा राजकीय आणि सामाजिक वारसा राजेश पाटील सक्षमपणे पुढे नेत असल्याचा आनंद आणि समाधान असल्याचे अजित पवार यांनी सांगितले होते. मात्र, विधानसभा निवडणुकीत त्यांचा पराभव झाल्याची खंतही त्यांनी व्यक्त केली होती. संपूर्ण कोल्हापूर जिल्ह्यात महायुतीचे सर्व आमदार निवडून आले, मात्र राजेश पाटील यांचा पराभव झाला, याकडे लक्ष वेधत ‘आमचा गड आला महाराष्ट्रात, पण आमचा सिंह गेला’, अशी भावना त्यांनी व्यक्त केली होती.
दरम्यान, गोकुळ दूध संघ ताब्यात घेण्याचा राज्य सरकारचा कोणताही हेतू नसल्याचे मुख्यमंत्री देवेंद्र फडणवीस यांनी यापूर्वी स्पष्ट केले होते. गोकुळ ही केवळ एका जिल्ह्यापुरती मर्यादित असलेली संस्था असल्याचेही त्यांनी नमूद केले होते. अध्यक्षपदाच्या निवडीवेळी एका गटाचे संचालक अनुपस्थित राहिल्याने आवश्यक कोरम पूर्ण होऊ शकला नाही आणि त्यामुळे वैधानिक पेच निर्माण झाला. हा पेच सोडवण्यासाठीच सरकारला हस्तक्षेप करावा लागल्याचे फडणवीस यांनी सांगितले होते. दोन्ही गटांनी एकत्र बसून तोडगा काढल्यास शासनाला संचालक नियुक्त करण्याची आवश्यकता भासणार नाही, असेही मुख्यमंत्री देवेंद्र फडणवीस यांनी स्पष्ट केले होते.
