जवळेथर केंद्र शाळेचे शिष्यवृत्ती परीक्षा आणि STS मध्ये घवघवीत यश

(राजापूर / तुषार पाचलकर)

 २०२५-२६ या शैक्षणिक वर्षात जवळेथर केंद्र शाळेने शिष्यवृत्ती परीक्षा तसेच STS परीक्षेत उल्लेखनीय कामगिरी करत शैक्षणिक गुणवत्तेची परंपरा कायम राखली आहे. विविध परीक्षांमध्ये विद्यार्थ्यांनी मिळवलेल्या यशामुळे शाळेचे नाव परिसरात उज्ज्वल झाले आहे.

शिष्यवृत्ती परीक्षेत विद्यार्थ्यांची चमकदार कामगिरी

इयत्ता सातवीच्या शिष्यवृत्ती परीक्षेत कु. अर्णवी अनिषा अनिल सुर्वे हिने जिल्हा गुणवत्ता यादीत स्थान मिळवले. तर कु. आराध्या शिवगण आणि आर्यन पांचाळ हे विद्यार्थी शिष्यवृत्ती परीक्षेत पात्र ठरले. इयत्ता चौथीच्या शिष्यवृत्ती परीक्षेत कु. प्रथमेश सुर्वे, शिवराज मोरे आणि सार्थक मोरे यांनी पात्रता मिळवून शाळेच्या यशात भर घातली. याशिवाय राजापूर तालुका शिष्यवृत्ती परीक्षेत कु. शिवांश रमाकांत मोरे याने द्वितीय क्रमांक पटकावत विशेष यश संपादन केले.

STS परीक्षेतही विद्यार्थ्यांचे यश

यावर्षी झालेल्या STS परीक्षेतही जवळेथर केंद्र शाळेच्या विद्यार्थ्यांनी उल्लेखनीय कामगिरी केली. अर्णवी सुर्वे, आराध्या शिवगण, प्रथमेश सुर्वे, शिवराज मोरे आणि प्रचिती कांबळे या विद्यार्थ्यांनी यश मिळवत ब्रॉन्झ मेडल पटकावले.

शिक्षक आणि पालकांच्या मार्गदर्शनाचा मोठा वाटा

विद्यार्थ्यांच्या या यशामागे त्यांचे सातत्यपूर्ण परिश्रम, शिक्षकांचे मार्गदर्शन आणि पालकांचे सहकार्य यांचा मोलाचा वाटा आहे. शाळा व्यवस्थापन समिती, ग्रामस्थ, केंद्रप्रमुख श्री. परटवलकर आणि मुख्याध्यापक श्री. कुरणे यांनी विद्यार्थ्यांना वेळोवेळी मार्गदर्शन व प्रोत्साहन दिले.

जवळेथर केंद्र शाळेच्या विद्यार्थ्यांनी विविध शैक्षणिक परीक्षांमध्ये मिळवलेल्या या उल्लेखनीय यशाबद्दल शाळा व्यवस्थापन, शिक्षक, पालक आणि ग्रामस्थांकडून विद्यार्थ्यांचे अभिनंदन करण्यात येत आहे. विद्यार्थ्यांची ही यशस्वी वाटचाल परिसरातील इतर विद्यार्थ्यांसाठीही प्रेरणादायी ठरत आहे.