(मुंबई / वृत्तसंस्था)
मुंबईतील जोगेश्वरी परिसरातील एका खासगी रुग्णालयात घडलेल्या धक्कादायक घटनेने खळबळ उडाली आहे. पोटदुखीचा त्रास होत असल्याने उपचारासाठी आलेल्या 19 वर्षीय तरुणीची रुग्णालयाच्या स्वच्छतागृहात अचानक प्रसूती झाली. घाबरलेल्या तरुणीने नवजात बाळाला स्वच्छतागृहातील कचरापेटीत ठेवल्याची माहिती समोर आली आहे. सुदैवाने बाळाच्या रडण्याचा आवाज ऐकून रुग्णालयातील कर्मचाऱ्यांनी तातडीने मदत केल्याने मोठा अनर्थ टळला.
नेमकी काय घडली घटना?
मिळालेल्या माहितीनुसार, 27 जुलै रोजी पोटदुखीचा त्रास होत असल्याने 19 वर्षीय तरुणी जोगेश्वरीतील एका नामांकित रुग्णालयात उपचारासाठी आली होती. रुग्णालयाच्या आपत्कालीन विभागात नोंदणी केल्यानंतर उपचारासाठी प्रतीक्षा करत असताना ती स्वच्छतागृहात गेली. याच दरम्यान तिची अकाली (Premature) प्रसूती झाली आणि तिने एका बाळाला जन्म दिला. अचानक घडलेल्या या प्रकारामुळे घाबरलेल्या तरुणीने नवजात बाळाला स्वच्छतागृहातील डस्टबिनमध्ये ठेवले.
बाळाच्या रडण्याचा आवाज ऐकून कर्मचाऱ्यांची धावपळ
काही मिनिटांनंतर स्वच्छतागृहाच्या परिसरातून नवजात बाळाच्या रडण्याचा आवाज येऊ लागला. आवाज ऐकताच सुरक्षा रक्षक आणि सफाई कर्मचाऱ्यांनी तात्काळ शोध घेतला. स्वच्छतागृहाचा दरवाजा आतून बंद असल्याचे लक्षात आल्यानंतर तो उघडण्यात आला. दरवाजा उघडताच डस्टबिनमध्ये नवजात बाळ आढळून आले. ही घटना पाहून रुग्णालयातील कर्मचाऱ्यांनाही धक्का बसला. त्यानंतर डॉक्टरांनी तातडीने बाळावर उपचार सुरू केले.
बाळाची प्रकृती नाजूक, आयसीयूमध्ये उपचार
प्रसूती वेळेआधी झाल्यामुळे नवजात बाळाची प्रकृती नाजूक असल्याचे डॉक्टरांनी सांगितले. प्राथमिक उपचारांनंतर बाळाला अधिक उपचारांसाठी विलेपार्ले येथील रुग्णालयात हलविण्यात आले असून तेथे अतिदक्षता विभागात (ICU) उपचार सुरू आहेत. दरम्यान, प्रसूती झालेल्या तरुणीवर जोगेश्वरीतील त्याच रुग्णालयात वैद्यकीय उपचार सुरू आहेत.
या संपूर्ण घटनेची माहिती मिळाल्यानंतर पोलिसांनी प्रकरणाची नोंद घेतली असून, घटनेमागील सर्व परिस्थिती आणि कारणांचा तपास सुरू आहे. अधिकृत तपास पूर्ण होईपर्यंत या प्रकरणातील इतर तपशील स्पष्ट होणे बाकी आहे.
