(मुंबई)
राज्यात मान्सूनने पुन्हा एकदा जोर पकडला असून मुंबईसह संपूर्ण कोकण किनारपट्टीला मुसळधार पावसाने झोडपून काढले आहे. या अतिवृष्टीमुळे मुंबईतील जनजीवन विस्कळीत होण्याची शक्यता लक्षात घेऊन मुंबई विद्यापीठाने मोठा निर्णय घेत आज (6 जुलै 2026) होणाऱ्या सर्व परीक्षा स्थगित केल्या आहेत. विद्यार्थ्यांच्या सुरक्षिततेला प्राधान्य देत विद्यापीठ प्रशासनाने हा निर्णय घेतला असून मुंबई, ठाणे आणि रायगड जिल्ह्यांतील शाळा-महाविद्यालयांनाही अधिकृत सुट्टी जाहीर करण्यात आली आहे. हवामान विभागाने मुंबई आणि आसपासच्या परिसरासाठी ‘रेड’ आणि ‘ऑरेंज’ अलर्ट जारी केला आहे.
सर्व परीक्षा पुढे ढकलल्या
अतिवृष्टीच्या पार्श्वभूमीवर 6 जुलै रोजी नियोजित असलेल्या मुंबई विद्यापीठाच्या सर्व परीक्षा स्थगित करण्यात आल्या आहेत. विद्यार्थ्यांना प्रवासादरम्यान कोणताही धोका होऊ नये यासाठी हा निर्णय घेण्यात आल्याचे स्पष्ट करण्यात आले आहे.
अधिकृत परिपत्रक जारी
मुंबई विद्यापीठाच्या ‘परीक्षा व मूल्यमापन मंडळा’चे संचालक डॉ. पूजा रौंदळे यांच्या स्वाक्षरीने 5 जुलै रोजी रात्री अधिकृत परिपत्रक जारी करण्यात आले. हवामान विभागाच्या अतिवृष्टीच्या इशाऱ्याचा विचार करून हा तातडीचा निर्णय घेण्यात आला आहे.
नवीन वेळापत्रक लवकरच जाहीर होणार
विद्यापीठाने स्पष्ट केले आहे की, स्थगित करण्यात आलेल्या परीक्षांचे सुधारित वेळापत्रक लवकरच अधिकृत संकेतस्थळावर प्रसिद्ध केले जाईल. विद्यार्थ्यांनी कोणत्याही अफवांवर विश्वास न ठेवता केवळ अधिकृत वेबसाइटवरील सूचनांचे पालन करावे, असे आवाहनही करण्यात आले आहे.
