(राजापूर / तुषार पाचलकर)
राजापूर पूर्व विभागातील प्रस्तावित अप्पर तहसीलदार कार्यालयाच्या मुख्यालयासाठी पाचल या ठिकाणाच्या मागणीला दिवसेंदिवस अधिक बळ मिळत असल्याचे चित्र दिसून येत आहे. विविध गावांतील नागरिकांकडून शासनाकडे वैयक्तिक हरकती आणि सूचना सादर करण्याचा ओघ वाढला असून, भौगोलिकदृष्ट्या, दळणवळणाच्या सोयी आणि उपलब्ध शासकीय सुविधांचा विचार करता पाचल हेच मुख्यालयासाठी सर्वाधिक योग्य ठिकाण असल्याचे अनेक नागरिकांचे म्हणणे आहे.
सध्या नागरिक स्वतःहून पुढाकार घेत शासनाकडे लेखी हरकती आणि सूचना सादर करत आहेत. या माध्यमातून पाचलच्या बाजूने लोकमत अधिक ठामपणे मांडले जात असून, निर्णय घेताना नागरिकांच्या भावना आणि प्रत्यक्ष परिस्थितीचा विचार करण्याची मागणीही करण्यात येत आहे.
नागरिकांच्या मते, पाचल येथे राष्ट्रीयीकृत व सहकारी बँका, पोस्ट कार्यालय, सेतू सुविधा केंद्र, ई-सेवा केंद्र, सीएससी (CSC) केंद्र, झेरॉक्स व स्टेशनरी दुकाने, तसेच विविध शासकीय आणि डिजिटल सेवा उपलब्ध आहेत. त्यामुळे महसूल कार्यालयाशी संबंधित बहुतांश कामे एकाच ठिकाणी पूर्ण करणे नागरिकांना सोयीचे ठरू शकते.
याशिवाय, पाचल हे मुंबई-गोवा राष्ट्रीय महामार्गाशी जोडलेले असल्याने येथे पोहोचणे तुलनेने सुलभ आहे. एस.टी. बस सेवा, खासगी वाहतूक, रिक्षा सुविधा आणि परिसरातील गावांशी असलेली सुलभ संपर्क व्यवस्था यामुळे सर्वसामान्य नागरिक, शेतकरी, विद्यार्थी आणि व्यापारी यांना कार्यालयीन कामांसाठी वारंवार प्रवास करणे अधिक सोयीचे होईल, असेही नागरिकांचे मत आहे.
“पाचल हा केवळ भौगोलिकदृष्ट्या मध्यवर्ती भाग नाही, तर विविध मूलभूत सुविधा उपलब्ध असलेले विकसित सेवा केंद्र आहे. त्यामुळे अप्पर तहसीलदार कार्यालय येथे झाल्यास संपूर्ण राजापूर पूर्व विभागातील नागरिकांना त्याचा प्रत्यक्ष लाभ होईल,” अशी भावना अनेकांनी व्यक्त केली आहे.
हरकती आणि सूचनांच्या माध्यमातून पाचलच्या बाजूने लोकमत सातत्याने मजबूत होत असून, शासनाने अंतिम निर्णय घेताना नागरिकांच्या मागणीचा, उपलब्ध सुविधांचा आणि प्रशासकीय सोयींचा गांभीर्याने विचार करून अप्पर तहसीलदार कार्यालयाचे मुख्यालय पाचल येथेच निश्चित करावे, अशी मागणी आता अधिक ठामपणे पुढे येत आहे.
