( जैतापूर / राजन लाड )
सागरी महामार्गावरील वाघ्रण येथील नंदनवन होमस्टे येथे सागरी पोलीस ठाणे, नाटे यांच्या वतीने ज्येष्ठ नागरिक सुसंवाद कार्यक्रमाचे आयोजन करण्यात आले. रत्नागिरी जिल्ह्याचे पोलीस अधीक्षक नितीन बगाटे यांच्या मार्गदर्शनाखाली व इतर वरिष्ठ अधिकाऱ्यांच्या सहकार्याने हा कार्यक्रम यशस्वीरीत्या पार पडला.
कार्यक्रमात पोलीस निरीक्षक अश्वनाथ खेडकर यांनी कोटुंबिक हिंसाचार, ज्येष्ठ नागरिकांवरील अन्याय, सायबर गुन्हे व फसवणूक कॉल्स, मादक पदार्थांचे दुष्परिणाम, व्यसनमुक्ती आणि सागरी सुरक्षेचे महत्त्व या विषयांवर सखोल मार्गदर्शन केले. तसेच, वैद्यकीय मदत व आपत्कालीन परिस्थितीत 112 क्रमांकाचा प्रभावी वापर कसा करावा, याची माहिती दिली. नागरिकांनी कोणत्याही अडचणीसाठी थेट पोलीस ठाण्याशी संपर्क साधावा, असेही आवाहन त्यांनी यावेळी केले.
कार्यक्रमात गावातील विविध क्षेत्रांतील ज्येष्ठ नागरिकांचा उत्स्फूर्त सहभाग होता. सहभागींच्या यादीत श्रीकृष्ण मयेकर, प्रदीपकुमार मयेकर, पत्रकार राजन लाड, नवनाथ शेलार, प्रकाश व प्रियंका नार्वेकर, मधुकर जोशी, वसंत वाईम, एकनाथ बावकर, सुरेश बावकर, पोलीस पाटील गजानन भोगले, दिलीप वालकर, मधुकर पावसकर, संभाजी जैतापकर आदींचा समावेश होता.
ग्रामपातळीवरील पोलीस पाटील नियुक्त्या, पोलीस प्रशासनाचे सहकार्य, तसेच स्थानिक अडचणी याविषयी चर्चा झाली. प्रदीप मयेकर यांनी मांडलेल्या प्रश्नांना पोलीस निरीक्षक खेडकर यांनी समर्पक उत्तरे दिली. स्थानिक नागरिकांनी स्वतःच्या पदरमोडीतून पोलीस प्रशासनाला दिलेल्या सहकार्याचे विशेष कौतुक यावेळी करण्यात आले.
कार्यक्रमाच्या अध्यक्षस्थानी ज्येष्ठ नागरिक संघाचे उपाध्यक्ष एकनाथ आडीवरेकर होते. व्यासपीठावर सचिव रमेश राणे व माजी मुख्याध्यापक श्रीकृष्ण मयेकर हे मान्यवर उपस्थित होते. पंचक्रोशी ज्येष्ठ नागरिक संघातर्फे पोलीस निरीक्षक अश्वनाथ खेडेकर यांचा शाल, श्रीफळ व गुलाब पुष्प देऊन सत्कार करण्यात आला.
कार्यक्रमाचे सूत्रसंचालन सत्यवान कणेरी यांनी केले, तर आभार प्रदर्शन रमेश राणे यांनी केले. या कार्यक्रमाच्या यशस्वी आयोजनासाठी संघाचे अध्यक्ष विलास चेऊलकर यांच्या मार्गदर्शनाखाली संघाचे पदाधिकारी व सागरी पोलीस ठाणे, नाटे येथील कर्मचाऱ्यांनी परिश्रम घेतले.
